1 SAMUEL 10 - Kathara Bible (BSI)

¹ Chiwui thili Samuelna thaokhong akha khuishoklaga Saulwui akuili chi heirora, kala ali maya̱khuida hānga, “Awui yur Israelwui wungnao sākhavai Prohona nali neokhami maningmala? Prohowui yurbingwuitungli nana mungra, kala kuimareida khalei athumwui yangkashebingwui pāng eina nana kanmira, kala hina nali khudam sāra kaja awui shimlui tungli wungnao sākhavai Prohona nali thao neomi kahaina.

² Aja nana iwui eina thuida Benjamin ngaleiwui Zelzahli, Rachelwui chikhur ngalemli mi khani samphangra kala anina nali hāngra, nana phākhavā gadhābing chiya samphanghaida phāhaira, kala navāna nawui vang ning kharikta ‘Inaowui vang I khisausikhala’ da hāngra.

³ Chiwui eina nana ungmeilaga Tabor shirimthing pheili, Vareli samphang khavai Bethelli vāki kaji mi kathum nali samphangra; athum akhana yaonao kathum phung, akhana khamuitang kathum, akhapāna drakhāra̱ sangkhavai khao phung jira.

⁴ Kala athumna nali mathānthup eina samphangda khamuitang khani mida nana athumwui pāng eina khuira.

⁵ Chiwui thili nana Gibeath-elohimli, Philistine raimi khalei pamli ungshungra; kala nana chiwui keinung chili ungkazang eina marān kachungkha kajuipamwui eina harp, tambourine, sipa, lyre singda shokki kaji tui hāngmikasā vātheira.

⁶ Chiwui thili Prohowui manglā chi pangshap leilak eina nali zangda nala kaphongli zangra, kala ngateihang kahai mi onhaora.

⁷ Chieina machutkakhui saikora hi nali samphang kahaiwui thili nana sāki kaji ot chi sālu, kaja Varena nali ngasomida lei.

⁸ Kala nana ili rida Gilgalli tāra, kala yanglu, rikkatā kachigat kala ningyatchigat pha̱phayā khavai ina nali chili tāngarokra. Kala nana saki kaji chi tāhāng khavai ina matāranglakha na shinithang ngaraisālu.”

⁹ Ana Samuelwui eina zatthuikhaleoda Varena khangatei ning akha sangmi, kala machutkhui khavai saikora chi chithang rāshokserhaowa.

¹⁰ Anina Gibe-ahli ungkashung tharan, ali marān kachungkha samphanga; kala awuitungli Varewui manglā zangmida ala phongkhami tui matuiya.

¹¹ Kala ali theikhamasuibingna, ana marānbingli ngasoda khamarān chi theilaga akha eina akha hāngngaroka, “Kishwui nao kathākahaikhala? Saulla marān akhala?”

¹² Kala chiwui mi akhana ngahānkai, “Avāva̱ khipākhala?” Chieina chānjam hithāda sai, “Saulla marān akhala?”

¹³ Ana marānmi kahaiwui thili, ana kajui pamli kāhaowa.

¹⁴ Saul eina awui raoli avāgatona hānga, “Nani kali vākhala?” Chieina ana hānga, “Gadha phākhavāna; laga masamphangthuda, inina Samuelli angahāna.”

¹⁵ Ana, “Ili hānglu, Samuelna nali khi hāngmikhala?” da hānga.

¹⁶ Kala Saulna avāgatoli hānga, “Ana Gadhābing chi samphanghaira, da shenglak eina hāngmi.” Kha ana wungramwui pongli Samuelna kahahāng akhala mahāngmana.

Saulli Awunga Kasang

¹⁷ Chitharan Samuelna Mizpahli mi saikora Prohowui mangāli hokhui;

¹⁸ kala ana Israelwui mibingli hānga, “Israelwui Proho Varena hithāda hānga, ‘Egyptwui eina Israelli ina thānshoka, kala ina Egyptnaobingwui eina kala nathumli rekakhareka wungrambingwui pāng eina kankhui.’

¹⁹ Kha, kakhanang kachotwui eina, sipkasāwui eina huikhame nathumwui Vareli ara mamayāla, ‘Ngga! ithumwuitungli awunga sangmilu’ da hānga. Chiwui vang eina ara nathum shang-shang kala thingthing eina kaziplaga Prohowui mangāli nathum khalatta rālu.”

²⁰ Chieina Samuelna Israel shang saikora khuirai, kala Benjamin shangli kalā yangda kapangkhui.

²¹ Ana Benjamin shangli hokhuilaga shimkhur shimkhur eina kalā yangda Matri shimkhurli kapangkhui; naolak eina Matri shim mipha̱ eina kalā yangda Kishwui naomayara Saulli kapangkhuihaowa. Kha athumna ali kaphā chitharan a maleisāthuwa.

²² Chieina athumna Proholi, “Mipā hi rākā marāmakhala?” da ngahāna. Kala Prohona, “Yanglu, otrombing haikhavai alungli ngathumda lei” da hānga.

²³ Chieina athumna totot ali chili aphākhui; kala mibingwui alungli ungkhanganing eina mibingli ana yartui eina thuida juimeiserhaowa.

²⁴ Kala Samuelna mibing saikorali hānga, “Prohona kapangkhui kahai mipa hili nathum theihairala? Mibing saikorawui ngachaili a kathā maleimana.” Chieina saikorana, “Awungali okpeimeiranu!” da vaowa.

²⁵ Chiwui thili Samuelna awungawui mashun kala awunga akhawui sarān-varān chi mibingli hāngmi; kala chi ana lairikli kapikhuida Prohowui mangāli hai. Kala mi saikorali kachichāshi shimli shiunserhaowa.

²⁶ Saulla aram Gibe-ahli unghaowa, kala Varena ningli sāzamida rai kapingbingla ali ngasounga.

²⁷ Kha akachang makhaninga mi kaikhana, “Mipa hina ithumli kathāda kanmishaprakhala?” Kala athumna ali ningkachaida khikhala makhuivāmimana. Chithālala Saulna sakta makhuimana.