1 SAMUEL 1 - Kathara Bible (BSI)

Samuel Kapharā

¹ Ephraimwui kaphungramli khalei Ramathaim-zophim kha̱li Elkanah kaho mi akha leisai. A Ephraim shangwui Zuphwui naomayara Tohuna kapharā Elihuwui naomayara Jerohamwui naomayarana.

² Ana prei khani ngashira; akhali Hannah hoi, khangatei akhapāva̱li Peninnah hoi. Kala Peninnahva nao leisai; kha Hannah nao maleimana.

³ Mipa hina saikorawui Proholi khorumda pha̱phayā khavai, aramwui eina kum kachida Shilohli kāchinga; apam chili Eliwui naomayara khani Hophni eina Phinehasna Prohowui pāngmon sāsai.

⁴ Elkanahna pha̱phayā thanga, apreiva̱̱ Peninnahlila anaomayarabing eina anao ngalāva̱binglila yar samichinga;

⁵ Kha ana Hannahli leishilaklala awui yar akhamāng mi, kaja Prohona ali nao shum ngasakhaowa.

⁶ Kala awui pheiva̱na malung thuikhavai, ali thurngasakchinga, kaja Prohona ali naopam shungmihaowa.

⁷ Chithāda kum kachida vāchinga; kala Prohowui shimli kakā atam kachida preiva̱̱ china ali malung thuingasakchinga. Chiwui vang Hannahna maphazāla chappama.

⁸ Kala agahara Elkanahna, “Hannah, khisāda maphazāla kachapkhala? Khiwui vang hiyākha malung kharingkhala? Naomayara tharāli I machongmeimala?” da hānga.

Hannah eina Eli

⁹ Athumna Shilohli phāshak phazākhui kahai eina Hannah thuihaowa. Atam chili Eli pāngmon Prohowui Khorumshim khāmongpheili pamsai.

¹⁰ Kala Hannahna malung ringlak eina Proholi seihā sāda wukkhananglāk eina chapa.

¹¹ Kala ana khangashit akha sāda hānga, “O saikorawui Proho, kalikhada narao sha̱nao iwui kakhanang hi theimida, kala ili phaningmida, narao ili mamalailakla mayarnao akha misi kaja, awui mirin peida ina Prohowui pāngli mira; kala akuili kuisighai maparmara.”

¹² Ana Prohowui mangāli seihā sāda leilakha, Elina Hannahwui khamor khangatha̱ yangpama;

¹³ Hannahna ningli seihā sāda, morchaimāng ngatha̱da akhon mashokmana. Chiwui vang eina khamarip sha̱nao-aili da Elina phaninga.

¹⁴ Kala Elina ali hānga, “Nana karankha sāngda marippamra? Zam khamang horhaolu.”

¹⁵ Kha Hannahna ngahānkai, “Khamarip maningmana amei; kha I ningkachotva sha̱naona. Zam lah zamsheila mamangmana, kha Proho mangāli ining phongkashokna.

¹⁶ Narao sha̱nao ili makaphāva̱na da makhuimialu, kaja iningli malung ringda iwui ningyāng makhaung chi matuishokta khaleina.”

¹⁷ Chieina Elina, “Chingri eina zatulu, Israelwui Varena nawui kapo chi ungshungmiranu” da hānga.

¹⁸ Kala Hannahna hānga, “Narao ili nawui mangāli khalumashanmilu.” Chiwui thili ana hanungda phāshak phāzāda ningkachot maleiluithuwa.

Samuel Kapharā Kala Dharkat

¹⁹ Athumna ngathorthakva Proholi thuikhorumlaga ashishim Ramahli hanunghaowa. Elkanah eina Hannah ngasopida Prohona Hannahli phaningungmi;

²⁰ kala atam ungkashung eina Hannah nao vaida mayarnao akha pharāhaowa, kala aming Samuel hoi, kaja Hannahna hānga, “ina Prohowui eina nao hi pokakhuina.”

²¹ Kala Elkanah kala ashi shimkhur saikora ngasoda kum kachidawui pha̱kaphayā chigat khavai kai, kala khangashit chi Proholi mikhavai kai.

²² Kha Hannahva makāmana, kaja ana agaharali hānga, “Naona na̱ reikhaleoda ina ali Prohowui mangāli khuivāda vāchitheira kala chili apamchangnaoranu.”

²³ Agahara Elkanahna hānga, “Nana phāra kaji chi sālu, nao na̱ mareiranglakha pamsālu; Prohona awui tui ungshungmiranu.” Chieina naoli na̱ mareiranglakha eina tangda preiva̱na nganaopama.

²⁴ Kala nao china na̱ reikahai eina, kum kathumwui mukkā akha, mathir shungkha, drakhāra̱ sangkhavai sāhuikhongkha da khuiphunglaga Prohowui shim Shilohli khuikai, chitharan nao chi nganuisai.

²⁵ Chieina athumna mukkā chi taithatlaga nao chi Elili mi.

²⁶ Kala Hannahna hānga, “O iwui amei! nana phaningungra, apam hili nawui mangāli nganingda Proholi seihā kasava̱ chi ina.

²⁷ Nao hiwui vang eina ina seihā sai; kala ina kapo chi Prohona mihaira.

²⁸ Chiwui vang eina ina nao hi Proholi mikahaina, a ringlakha eina tangda Proholi mikahaina.” Kala athumna chili Proholi khoruma.