1 PETER 3 - Kathara Bible (BSI)

Preigahar

¹ Hithada sāda preiva̱ ngarā, nathum khalatta gahara ngarāli hamsanglu. Chieina athum kaikhana Vare tui hili mashitsangsālala nathumwui acham-aramna athumli yuikhuida shitsang ngasakakha nathumna tuikhur akha hānglui khavai maleiluimana.

² Kaja nathumwui acham-aram chi kayākha tharkhala kala khayāshingaikhala da athumna theira.

³ Nathumna sam hākharikta kasā, ngachānsari kasā kala khamathā kashankachon khangavai chithada akormāngli mathā khavai masaalu.

⁴ Kha Varewui miktāli aman kasaka tākui kahai kala khanima ningngai, mashimānkapai eina wuklungwui khangathuma mi sāthulu.

⁵ Achālakhawui shitkasanga sha̱naobingna Vareli chihānda gahara ngarāli hamsanglaga athum khalatta mathā ngasaka.

⁶ Sarahna chithada sai; agahara Abrahamwui kahāng nganai kala ali “Iwui amei” da hoi.

⁷ Chithada sāda gahara ngarā, preiva̱ ngarāli ngasopamda athum ngazanmei kaji theiphalungra. Khayākashiwui khalum eina ngasoda ot sakrumlu. Chieina Varewui lukhamashan mirinwui lemmet chi nathumna samphangra. Chithākha nathumwui seihā kasāli masheikhautmara.

Khamashung Kasāwui vāng Kachotkachāng

⁸ Naomeikapta, nathum saikora ngaraikachā ningphanin kala ningngai leiphalungra; akha eina akha chinaongarā thada leishilu, kala akha eina akha lumashanthei ngarokta lāngkaso ningngai malei ngarokphalungmara.

⁹ Makaphāwui vang makaphā masaalu, khonkashiwui vang makhonshialu, kha somitha̱lu, khikhalajila nali hokhuithang Varena sokhami hi ngashitsang kahaina.

¹⁰ Hithada kapihaili: “Ringkaphā mirin ningkachangpā kala khamathā atam theikhangaipā china, makaphā tui khamatui kala kakapik tui khamatui thāhaiphalungra.

¹¹ Makaphā-makhayāwui eina ana ngareithuihailaga kaphā sāranu; chingri kahai phāda chi kharomranu.

¹² Khikhalajila Prohona khamashungabingli yangmida lei, kala athumwui seihā kasā chi nganāmi; kha makaphā kasābing chili ana ngasunga.”

¹³ Nathumna kaphā chi sangaiakha khipāna zakkashi sāshaprakhala?

¹⁴ Khamashung khangarongwui vang nathumna kachotkachāng samphangsālala, nathumli somira, khipālikha mangacheealu kala wukla makhanangalu.

¹⁵ Kha nathumwui wuklungli Khristali khayāshilu kala Prohona da mayālu. Ali kachihānwui pongli nathumli ngahānakha ngahānkāthei khavai ngarān kharirikhailu.

¹⁶ Kha khanim kala khayākashi eina ngasoda sālu. Nathumwui mashun-makhui ngatarteihailu, chithākha Khristawui thikashurana da kaphā kasāwui vang nathumli kachipat tharan athum khalatta khayakkhuira.

¹⁷ Khikhalajila Varewui kaphaningna jiakha makaphā kasāwui vang kachotkachāng kaphungle kaphā kasāwui vang kaphungna phāmei.

¹⁸ Kaja Khristanala morei kaphungbingwui vang thimikhashida ngachanghaira, ithumli Vareli thānzang khavai katharali makatharabingwui vang phasā eina chithita, kha manglā eina ringlui ngasaka.

¹⁹ Ana manglā eina vāda narkahai manglābingli atamchithei.

²⁰ Manglābing chiya Noahna awui marikhong semlakha Varena honsānlak eina honlaga makhuikasangbing china. Marikhonglungli leikasā athum chishatmāng tara̱wui eina huikhuiya.

²¹ Hi arui nathumli huikakhui ra̱kahikwui amahāna. Hi pha̱sāwui khamakhao pheokatā maningmana, kha ana Vareli mayāda ning horsangchaolaga awui kahāng nganāra da ra̱kahikwui otsak kasāna. Jishu Khristawui ringkashok china nathumli huimi.

²² A kazingramli vāhaira kala Varewui yāshong pamda kazingraobingla, kazingwui khangamkharei kala saikorala awui pāngli leisera.