1 PETER 2 - Kathara Bible (BSI)

Rihailung kala Kathara Yur

¹ Chieina nathum khalatta makaphā-makhayā chi horhaolu. Makapikluialu, maphārekalu, mayuishialu kala kaphor tui mamatuialu.

² Pharādhadhar angangnao thada atam kachida kashenga manglāwui seina̱ ningchānglu. Chithada sāda chi khamangwui vang nathum rarsangda kahui samphangra.

³ Hithada kapihaida lei; “Prohowui lukhamashan nathumna mazaphaira.”

⁴ Mikumona horkahai kha Varena kapangkakhuia aman kasaka lunggui Proholi rālu.

⁵ Nathum khalatta kharinga lunggui ngasāda manglāwui shim sākālu. Kathara pāngmon ngasā khavai Jishu Khristawui mangā eina Varena khuisangkapai manglāwui hanphut chigatlu.

⁶ Hithada kapihaida lei; “Yanglu, aman kasaka ngalung akha ina kapangkhui, kala Zionwui akhoka sāda shunhai; ali shitkasangbing ning makatatlakmara.”

⁷ Ali shitkasangbingwui vanga aman saklaka; kha mashitkasangbingwui vanga kapi kahai hithada: “Makānāmana, da shim kasaana horkahai ngalung chi phāmeikap kaje akhoka ngasāhaowa.”

⁸ Khangateilila hithada kapihaili: “Mibingli phei ngaphok ngasakki kaji lunggui, athumli konglui ngasakki kaji lunghār” kaja athumna kahāng makhanganāwui vang phei ngaphoka; chi Varewui kaphaningna.

⁹ Kha nathum kapangkhui kahai miyur, wungnao sharva̱, kathara yur, Varewui mibingna. Tangkhamangwui eina kahorli thānshokta awui matakkhak kahai kahor chi hāshok khavai nathumli hokakhuina.

¹⁰ Atam akhali nathum Varewui mi mangasāsamana, kha ara awui mibingna. Atam akhali nathum awui lukhamashan matheisāmana kha ara nathum theihaira.

Varewui Raobing

¹¹ Ngapha̱yang eina ngayinkazata leikashebing, ina nathumli ngakaoli. Manglāli rai ngararda khalei phasāwui khamathang chili mamayaalu.

¹² Yurkhangateibingwui alungli acham-aram mathada zatlu, chithākha nathumli khangui khalāng mina da phensālala nathumwui kaphā ot chi athumna theira kala a rāthang Vareli tekkmatei ngasakra.

¹³ Prohowui vang eina nathumna okathuiwui pangshap kasingbing: juimeikap kaje wungreilapai,

¹⁴ lah makaphā kasaali tandi mikhavai kala khamashung kasaali sākhavai ana shirāt kahaia governorbingli mayālu.

¹⁵ Kaja nathumwui kaphā kasā china phenphāphā kajebingli mamorsap khangasak hi Varewui ningkachāngna.

¹⁶ Ningkhān kahaia mibing thada okthuilu, chithālala nathumwui ningkhān kasā chi makaphā-makhayāwui vang masā ngasakalu. Kha Varewui raobing thada okthuilu.

¹⁷ Mi saikorali khayāshilu, avānao ngarāli leishilu, Vareli ngacheelu, kala wungreili khayāshilu.

Ngayo khavai Khristawui Kachotkachāng

¹⁸ Raobing, nathumwui akhavābingli khayākashi eina ngasoda mayāchaolu, lumashankatha a eina khanima māngli maningla sāshida kasā akhavābinglila khayāshilu.

¹⁹ Nathumna maphungkhangayi kachotkachāng chi Varewui kaphaningnada theilaga phungshapakha nathumli Varena somira.

²⁰ Nana khalāng ot sākahaiwui vang samphangkhangayi tandi samkaphang tharan kakhāngwui tongkazā khi leikhala? Kha nana khamashung ot sāhailala nali tandi mida chiwui vang khāngakha Varena chiwui vang somira.

²¹ Varena hikathāwui vang nathumli kahona, kaja Khrista khalatta nathumwui vang chotmi kala ngayo khavai haimi. Chieina nathumna awui pheichon kazunpaira.

²² A morei masāmana kala kakapik tui khamatui khipānakha mashāmana.

²³ Ali kachipat chitharan ana kachipat tui eina mangahānkāmana; Ana kachot tharan mamachitmana, kha khamashung bicharsame Vare chili awui kachihān leichinga.

²⁴ Moreili thihailaga khamashung khangarong ot sākhavai, Khrista a khalattana ithumwui morei aphasāli ngasoda thingtungli phungmihaira.

²⁵ Nathum yaonao thada ma̱zatsai, kha ara Yaokahoma kala Manglā Mayonkhame chili latunghaira.