1 PETER 1 - Kathara Bible (BSI)

Shālam Tui

¹ Pontus, Galatia, Cappadocia, Asia kala Bithyniali ngapha̱yang eina kashamvā kahaibingli paokazata Peterna,

² Avāva̱ Varewui kharin athishurda kapangkhui kahaia kala Jishu Khristawui kahāng nganā khavai kala awui ashee eina chairormi khavai Manglā china kathara mibing sāngasak kahaibingli kagapina. Lukhamashan kala chingri kahai chi chungmataimeida nathumwui ngasāranu.

Kharing Kachihān

³ Ithumna Proho Jishu Khristawui Avāva̱ Vare chili ningkashi misa! Khikhalajila Jishu Khristali kathiwui eina ringlui khangasak mangā eina ithumli awui hakkhamahā leikashiwui alungli mirin kadhar mihaira. China ithumli kharing kachihān chipemmi.

⁴ Chiwui vang Varena awui mibingli haikhami shānla makakhui sokhami samphang khavai ithumna mangāshong yangvai. Ana nathumwui vang mashuikapai, mamakhaokapai kala mashimānkapai chi kazipmihaili.

⁵ Khanaowa zimiksholi phongmiki kaji huikhamili ngaraida ningtongda shitkasang mangā eina Varewui pangshapna mayonmida khaleina.

⁶ Atam kasha̱khawui vang nathum kachotkachāng samphanglala, lan hiwui vang ringphālu.

⁷ Hiwui khangarān hiya nathumwui shitkasang akachanga chi phongshok khavaina. Shimankapai sinā meili ruikhayang thada sakmeikhar kaja nathumwui shitkasangla chāng yangphalungra, chi nathumwui shitkasang ngatarmei khavaina. Chiwui thili Jishu Khristali rāchitheithanghon nathumna masot, tekhamatei kala maikhayā samphangra.

⁸ Ali nathumna matheirangsālala leishi kala mik eina matheilala shitsangada ringkaphā khamathān khamor eina mahāngrarmana.

⁹ Khikhalajila ali shitkasangwui kharin, manglāwui huikhami chi nathumna samphangda lei.

¹⁰ Huikhami hiwui pongli marānbingna munlak eina ngathingkhuida Varena nathumli miki kaji sokhami tui athumna phongmihaisai.

¹¹ Athumna atam chi katharān kala kathada rānikhala da theikhavai ngarāna. Kala Khristana kachotkachāng kachungkha samphangra, kala khāngmida chiwui thili tekhamatei rāra da Khristawui Manglāna marānbingwui wuklungli atam chi chiza̱mi.

¹² Marānbingli Varena phongkhami hi athumwui vang maningmana, kha nathumwui vangna kaja paokazatbingna kazingramwui eina kashirāt Manglā Katharawui mangā eina nathumli hāngkhami ot hi kazingraobingnala theingai.

¹³ Chiwui vang eina nathumwui ning ngazipmeilu. Ningkhariklu kala sokhami chiwui vang nathumwui kachihān leichingda Jishu Khristali theithang nathumli sokhami mira.

¹⁴ Varewui kahāng nganālu, achālakha mangma̱da leilakha pha̱sāwui ningkachāngmāng kaphaning thada maokthuialu.

¹⁵ Kha nathumli hokakhuia awui kathar thada nathumwui acham-aram saikorali tharlu.

¹⁶ Hithada kapihaida lei, “Nathum tharlu, khikhalajila I katharana”.

¹⁷ Nathumna Vareli seihā kasā tharan Avā da hoi. Ana saikorali kachichāna sākahai chiwui athishurda ngaraichā eina bichar sai. Chieina okathuili ringda leilakha ali khayākashi eina ngasoda okthuilu.

¹⁸ Nathumli navā ngarāwui eina shākhuikhamaron khikha masākhavai mirinwui eina ngatangkakhui chi shimānkapai sinā lupā eina maningmana kaji nathumna thei,

¹⁹ kha chukhara̱ makhalei achukkapei yaonao kathā Khristawui aman kasaka ashee einana.

²⁰ Okathui masāranglakhawui eina ali chukkahaina kha nathumwui vang eina khanaowa atamli chitheinao kajina.

²¹ Awui mangā eina nathumna Vareli shitsanga. Ali Varena kathiwui eina khangmathotta tekhamatei chi mi; chieina nathumwui shitkasang kala kachihān chi Vareli lei.

²² Achinā ngarāli ningtharda leishi khavai khamashung chili kahāng khanganāwui vang nathum khalatta tharhaogada, nathum akha eina akha ningtongda wuklung eina leishi ngaroklu.

²³ Varivarawui kharinga kala leiching kaje tui chiwui mangā eina shimānkapai athā eina maningla mashimānkapai athā eina nathumli pharā ngasakluishithaira,

²⁴ kaja hithada kapihaida lei; “Phasā khavaia saikora khawo kathāna, athumwui tekhamatei awon kathāna, khawola ngahui kala awonla pa̱tai,

²⁵ kha Prohowui tui chiya katang mavaila ngayurzatchinga, tui chi nathumli hāshok kahai khamathā paokaphā china.”