1 JOHN 2 - Kathara Bible (BSI)

Khrista Ngachonme

¹ Inaongarā, ina kakapi hi nathum morei masā khavaiwui vangna; kha kachikathāna sāhaisālala Avāva̱wui mangāli ithumwui vang phayetkhame khamashung khangaronga Jishu Khrista leili.

² Khrista akhalatta hi ithumwui morei pheomi khavai apongna, ithumwui moreiwui vangmāng maningla apuk-apagawui vangna.

³ Ithumna Varewui ningkhami nganākha ali ithumna thei da theishingkhui.

⁴ Ishameili thei jilaga awui ningkhami manganāsangakha a chi kakapika mina kala awuili khamashung maleimana.

⁵ Kha kachikathāna awui tui mayonakha, kachangkhat awuili ana Vareli leikashe chi kāshunghaira, hi eina ithum awuili lei kaji ithumna theishingkhuipai.

⁶ Vareli zanga kaji mi china Jishu Khristawui thada okthuichingranu.

Kadhara Ningkhami

⁷ Leikashebing, ina nathumli kadhara ningkhami kakapi maningmana kha haokaphokwui eina nathumna samphang kahai kachama ningkhami china. Kachama ningkhami chi nathumna shākahai tui china.

⁸ Chithālala ina nathumli kadhara kakaso khamina. Hiwui khamashung hi Khristawuili lei kala nathumwuili lei. Kaja tangkhamang kānthuimamānhaida kachangkhatwui kahor shokpinghaira.

⁹ Kahor lungli lei jilaga nachināli yangkharingakha chikathā mi chi tangmangting eina leifaya.

¹⁰ Achināli leikashe mi chi kahorlungli lei, kala awui eina mi kateibingna phei ngaphok khavai maleimana.

¹¹ Achināli yangkakharinga a chiya tangkhamangli lei. Ana chiwui alungli leihaoda kali vanikhala dala matheimana, khikhalajila tangkhamang china ali mik ngapeo ngasakhaowa.

¹² Inaongarā, Khristawui mangā eina nathumwui morei pheomihaira kajiwui pongli ina kagapina.

¹³ Avāva̱ ngarā, ina nathumli kagapina kaje haokaphok eina thuida leikasā ali nathumna thei; yaronnaobing, nathumna makaphā chili yuihaira kajiwui vang ina hi kagapina; naoshinaobing, ina nathumli kagapina kaja nathumna Avāva̱ chili thei.

¹⁴ Avāva̱ ngarā, ina nathumli kagapina kaja haokaphokwui eina leikasā ali nathumna thei. Yaronnaobing, nathumli kagapina kaja nathum panglaka kala Varewui tuina nathumli ngasomida nathumna makaphā chili yuihaira.

¹⁵ Okathui kala chiwui alungli khalei otbing chili maleishialu. Nathumna okathuili leishiakha Avāva̱li maleishimana.

¹⁶ Okathui otli ningchāngmeida morei kasā, mikwui kakahao, okathuiwui lāngsot saikora hi Avāva̱wui eina kharā maningmana, kha okathuiwui otsera.

¹⁷ Okathui kala chiwui alungli khalei mibingna ningkachāng saikora shimānserhaora kha Varewui kaphaning kasābing mashimānda ringra.

Khristawui Yangkashe

¹⁸ Naoshinaobing, hi khangachanga atamna. Khristali makhamayā rārada nathumli rida hānghaira, kala kachangmamakta ara Khristali makhamayā kachungkha shokhaira. Chieina hi khangachang atamna da ithumna thei.

¹⁹ Athum chi ithumwui ngarumsakli kachangkhat makazangwui vang thuikahaina; ithumli zangchaosi kaja athum mayāmlakmara. Kha ithumwuili mazangchaomana kaji ngahāhang eina theikhui khavai athum thuikahaina.

²⁰ Kha Khristana heirorkhami Manglā Kathara chi nathumna samphanghaira, chiwui vang eina nathum saikorana khamashung chi theikahaina.

²¹ Nathumna khamashung chi matheimana kajiwui vang kakapi maningmana, kha nathumna chi katheiwui vang kala khamashungwuili kakapik mashokmana kajila katheiwui vang kagapina.

²² Ara kakapika chi khipā? Jishu hi Messiah maningmana da kahāngapā china. Chikathā mi chi Khristawui Yangkashena — ana Avāva̱lila, Anaolila khaninili mamayāmana.

²³ Anaomayarali makhamayā mi chi Avāva̱lila mamayāmana. Anaomayarali khamayā chi Avāva̱lila mayai.

²⁴ Haokaphokwui eina shākahai chi nathumwuili leichingranu. Haokaphokwui eina shākahai chi nathumli leichingakha, nathumla Anaomayara eina Avāva̱li ngasoda okthuirumchinga.

²⁵ Khristana ithumli mira da ngashitmi kahai chi makashimān mirin china.

²⁶ Nathumli minamki kajebingwui pongli ina hi kagapina,

²⁷ kha nathumwui vanga Khristana nathumli Manglā Kathara heirormihaira. Awui Manglāna nathumli ngasomida leilakha eina tangda nathumli khangateina tamkachithei kankhanā maleimana, kaja awui Manglāna saikora tamchithei kala ana tamchithei kahai chi khamashungmānga, khalāng mazanglakmana. Tamchithei kahai saikora chi mayonda Khristali leichinglu.

²⁸ Ara naoshinaobing, ali leichinglu, chithākha ana rāthanghon khayakta mangathumla pinglak eina samphangshapra.

²⁹ Khristava khamashungana da nathumna thei. Chiwui vang eina mashun ot kasā mi kachiva̱ Varewui naona da theiphalungra.