1 JOHN 1 - Kathara Bible (BSI)

Kharinga Tui

¹ Haokaphokwui eina leikasā kharinga Tuiwui pongli ithumna kagapina. Ithumna shāhaira, ithumwui mik einala theihaira; mha, mik einala theihaira kala ithumwui pāngna saza̱haira.

² Kharing kaho chi azak eina theipai kahai tharan ithumna mik eina thei, chiwui vang eina Avāva̱li ngasoda khalei kala ithumli chitheimi kahai makashimān kharingwui pongli nathumli matuida kahāngna.

³ Ithumna theikahai kala shākahai chi nathumlila hāngkachitheina. Chieina ithumna Avāva̱ kala Anaomayara Jishu Khristali ngarumsak khalei chili nathumla ithumli ngasoda zangpaira.

⁴ Ithumwui khamathān chi kashungmei khavai hi kagapina.

Vare Hi Kahorna

⁵ Anaomayarawui eina shākakhui chānpao kala nathumli kahāng chi hina: kaja Vare hi kahorna, awuili tangkhamang maleimana.

⁶ Ithumna ali ngarumsak lei jilaga tangkhamanglungli leiakha, tuimāng maningla otsak einala ithum kakapikna.

⁷ Kha ana kahorli khalei thada— ithumna kahorli okthuiakha ithum akha eina akha ngarumsak lei, kala Anaomayara Jishuwui ashee china ithumli morei saikorawui eina tharmi.

⁸ Ithumna ithum morei maphungmana jiakha ithum khalatta mikhanamna, kala ithumwui alungli khamashung maleimana.

⁹ Kha ithumna ithumwui morei Vareli hāngphatakha ana awui tuingashit chi makaimara, kala mashun chi sāmira: ithumwui moreila pheomida khayon sākahai saikorawui eina ana tharmira.

¹⁰ Kha ithumna morei masāmana da hāngakha ali kakapika sāngasaka, kala awui tui ithumwuili maleimana.