1 CORINTHNAO 7 - Kathara Bible (BSI)

Ra̱kasa̱wui Apong

¹ Nathumna ili kakapiwui tuipong chi ara hina. Ra̱sa̱ maphālala phai.

² Kha shuikhangashai kasui tarākha leihaoda mayarnao kachiva̱na kachichā preiva̱ leiranu,

³ kala sha̱nao kachiva̱na kachichā gahara leiranu, mayarana gaharawui acham sāda kala sha̱naopāva̱na preiva̱wui acham sāda ningyang ungasak ngarokta ngakumranu.

⁴ Preiva̱na a khalatta aphasāwui akhavā maningmana. Chithada sāda gaharanala a khalatta aphasāwui akhavā maningmana, kha apreiva̱nana.

⁵ Seihā sākhui khavai khaninina mayāngarokta atam kasha̱nakhawui vang pākkhangarok maningakha akha eina akha mamayā khangarok masaalu, pāksālala ngakumluishitlu, maningakha khalatta mangarinkharar eina Satanwui kasuili tazanghaipaishina.

⁶ Ina nathumli hithāphalungra da kahāng maningmana, kha mayākhami kathā eina kahāngna.

⁷ Mi saikora I thāngasakngai, kha mi kachiva̱ Varewui eina samkaphang ngakheikhang kahai lemmet chi ngateisera. Mi akhali akha, khangatei akhali akha da mi.

⁸ Ra̱sa̱ mapharang kajibing eina ra̱meiva̱bingli kahāngna kaja athumwui vanga iwui thada ra̱sa makaphā phāmei.

⁹ Kha khalatta mangarinrarakha ra̱sa̱ phalu kaja malungkachāng meichotle ra̱sa̱ kaphāna phamei.

¹⁰ Ra̱sa̱ phakahaibingli kakaso hi ina maningmana kha Prohona kakasona kaja preiva̱na gaharali mahorhaipaimana.

¹¹ Kha ana horhaiakha ra̱meipamphalungra, maningakha gahara chili mashitkhuiluiranu, kala gaharana preiva̱li mapāngpaimana.

¹² Khangateibingli ina kahāngna (Prohona kahāng maningmana): kaja shitkasanga mayarnao akhana mashitkasanga sha̱nao akhali preiva̱ sāda ngakumlaga preiva̱ china ali ngasopamra jiakha anala preiva̱ chili mapāngpaimana,

¹³ shitkasanga sha̱nao akhana mashitkasanga mayarnao akhali ngakumlaga gahara china ali ngasopamra jiakha anala gahara chili mapāngpaimana.

¹⁴ Mashitkasanga gahara chi shitkasangva̱ preiva̱wui mangā eina Varewui mangāli khuisangkapai ngasāhaowa; kala mashitkasang preiva̱ chi shitkasanga gahara chiwui mangā eina Varewui mangāli khuisangkapai ngasāhaowa. Chi maningsi kaje nanaongarā matharmara, kha chithada leiakha athum thara.

¹⁵ Chithālala, mashitkasanga china pākhaora jiakha, pākhaoranu. Chikathā chile shitkasanga gaharalapai, preiva̱lapai khalap kahai maleimana. Khikhalajila Varena nathumli chingri eina okthui khavai hokakhuina.

¹⁶ Shitkasanga preiva̱, nagaharali nana mahuikhuirarmara da kathada nana hāngshapkhala? Kala shitkasanga gahara, nana napreiva̱li mahuikhuirarmara da kathada hangshapkhala?

Varena Hokakhui Athishurda Okkathui

¹⁷ Mi kachiva̱na Prohona ali chisin kahai kala hokakhui chiwui athishurda okthuiranu; hi Church kachiva̱li ina tamkachithei ayinzana.

¹⁸ Varena hokakhui tharan ahui rimshokhairasākha chithāpapamhaoranu. Marimkashok mili hokhuiakha marimshokluiaranu.

¹⁹ Kaja ahui rimkashoknala, marimkashoknala khikha maningmana, kha Varewui ningkhami khamayon hina khamataiyana.

²⁰ Varewui kaho khuikasang chitharan ana leikasā chithada mi kachiva̱ chithada leiphalungra.

²¹ Varena kaho tharan rao sāsālā? Khikha maleimana, kha ningkhānkapai apong leili jiakha sākhuikhalailu.

²² Kaja Prohona hokhui kahai rao chi awui ningkhānwui mi sāhaira; chi tākam eina ningkhān mi chi Varena hokhuihaiakha Prohowui rao ngasāhaowa.

²³ Varena aman mida nathumli lokhuihaira. Chieina mibingwui rao masāluialu.

²⁴ Ivānaobing, mi kachiva̱na ali hokhuithang leikasā chi tākam eina Varewui ngarumsaklunglila chithada leiphalungra.

Ra̱sa̱ Maphārang kajebing eina Ra̱meinaobingwui pongli Khangahān

²⁵ Ara ra̱sa̱ mapharang kajebingwui pongli nathumna kapikharā: Ina Prohowui eina kakaso masamphangmana kha shitsangkapaia akha sāda iwui kaphaning hi kachitheina.

²⁶ Aruihonwui kakhanang hi theilaga mayarnaowui vanga ana khalei thada leikasāna phāmeira.

²⁷ Na napreiva̱ leihairala? Pāngkhavai masālu. Na ra̱sa̱ maphāranglā? Phakhavai masālu.

²⁸ Kha ra̱sa̱ phākhuilala morei kasā maningmana kala ngalānao akhana fathuilala morei maningmana. Kha ra̱sa̱ phākahaibingna thangthangwui kakhanang samphangki kaji chi masamphang ngasakngaimana.

²⁹ Ivānaobing, ina kahāng chi hina: Khanaowa atam chi masāngleithura, ara preiva̱ khalei athum china preiva̱ makhalei thada okthuiranu,

³⁰ kala chapkhangachābing china makakhanang thada, khamana̱bingna makhamathān thada, khalobingna athumwui makhaning thada,

³¹ kala okathuiwui otli sakta kaphaningbingnala makaphaning thada okthuiranu, kaja arui leida khalei okathui hi masangleiluimara.

³² Ina nathumli ningkachotwui eina ningkhān ngasakngai. Ra̱sa̱ makaphā mina Prohowui ningyāng ungkhavai ningsanglak eina ot sai.

³³ Kha ra̱sa̱ phakahai mayarnaova apreiva̱li ningyāng ungngasak khavai okathuiwui otli sakmeida khuiya. Chieina awui ning pakrāhaowa.

³⁴ Mafakathui sha̱nao lah ngalānaova Prohowui otli sakmeida khui, khikhalajila ana awui phasāla kala manglāla dharchigatngaiya. Kha fathui kahai sha̱naona agaharali ningyāng ungngasak khavai okathuiwui otli sakmeida khuiya.

³⁵ Hi nathumwui vang phākhavai kahāngna, nathumli hapkhano khavai kakhām maningmana. Kha nathumli khamashung Prohowui otram ngatha̱ ngasakngai.

³⁶ Khāmhailaga mangakumla thada pamngarokhaosa da mayā ngarokhailaga mayarana khāmkahaiva̱li yansaingaihaida kala awui malungkachāng maphungrarthuda ngakum kahaina phāmeira da phaningakha, awui ningkachāng athishurda ngakumhaoranu, chili morei khikha maleimana.

³⁷ Kha kachikathāna mangakumlakmara da awui ningli nganingtithaiakha kala akhalatta ngarinshapakha mangakumlala phai.

³⁸ Chieina khāmkahaiva̱li kakhui chi phālaka, kha mangakumlak kajina phameilui.

³⁹ Agahara ringda leilakha preiva̱ china ningkhān masāpaimana. Agahara thihaiakha ana ngakumkhangai mi chili ngakumpai; kha Prohowui mingli fathuiphalungra.

⁴⁰ Chithālala, ana mafathuila pamhaiakha ringphameikharra. Hi iwui kaphaningna, thalala hili Varewui Manglā zanga da shitsanga.