1 CORINTHNAO 6 - Kathara Bible (BSI)

Vareshinaobing Karotli Kakā

¹ Nathumwui ngachaili kachikathā achinā akhana akhawuitungli tui kashok chitharan katharabingli mangachami ngasakla kachiwui vang eina mashitkasangabingli bichar sāmi khavai vākhala?

² Shitkasangbingna okathuili bichar sāra kaji nathum matheimalā? Kala okathuili nathumna bichar sāra jiakha, khikha makhaninga tuinao chi mangazekkhuitheimalā?

³ Ithumna kazingraobingli bichar sāra kaji nathum matheimalā? Chithākha okathui hiwui otli kayākhashida mataimeida ngazekshaprakhala?

⁴ Hikathāthā tuishot nathumwuili leiakha, kachiwui vang eina churchna matheimiphaphut kajebingwuili ngazekmi khavai khuivārakhala?

⁵ Hi khayak khavaina! Nathumwui ngachaili ngachami khavai theithangkhamei mi akhala mazangsāthulā?

⁶ Nathum akhana akhali kārotli khuivālaga mashitkasangbingli bichar sāngasaka kajilā?

⁷ Akha eina akha ngahor khangarok hina nathum shimānchao kahaina da chithei. Chiwui vanga yontha̱ kajina maphāmeimalā? Kala mi kateina kateizātha̱ kajina maphāmeimalā?

⁸ Kha nathum khalatta akhana akhali khayon sāngarokta lei kala kateizā ngarokta lei.

⁹ Makaphā-makhayābingna Vare wungramli mazangmara da nathum matheimalā? Matheinguihaialu, shāmkasābing, ama̱li kapha̱bing, phokaphābing, mayarnao eina mayarnao, sha̱nao eina sha̱nao phasā khangasobing,

¹⁰ khalebing, kākharāmabing, khamaripabing, khamashātabing kala phama̱kashaobing khipākha Vare wungramli mazangmara.

¹¹ Nathumwui ngachaili mi kaikhava hikathā sāsai, kha Varewui Manglā kala Proho Jishu Khristawui mingli nathumli pheomihaira, tharngasakhaira kala mashung ngasakhaira.

phasā eina Vareli Tekmatei Ngasaklu

¹² Kaikhana hānga, “Iwui vanga ot saikora sāpaisera,” kha saikora kannāser kaji maningmana, “Iwui vanga ot saikora sāpaisera” kha khi otnakhala ili mayui ngasakmara.

¹³ Khangateinala hithada hānga, “Kashakazā hi wukwui vangna, kala wuk hi kashakazāwui vangna.” Mha, chithālala Varena khanini chi shimān ngasakra. phasā hi Prohowui sāhaoda khamathang-khamarangli shichin khavai maningmana, kha Proholi otram ngatha̱ khavaina.

¹⁴ Varena Proholi ringluishit ngasaka. Awui pangshap eina ithumlila ringluishit ngasakra.

¹⁵ Nathumwui phasā chi Khristawui phasākaina da matheimalā? Khristawui akai akha khuilaga pha̱khayorva̱̱wui akai ngasā ngasakpairala? Masākapai otna.

¹⁶ Khayorva̱li phasā khangasopā chi khayorva̱li asā akha sāhaira kaji nathumna matheimalā? Hi thada tharlak eina kapihaili, “Khani chi asā akha sāhaora.”

¹⁷ Kha Proholi kazanga mi chi manglā eina Proholi ngarumhaira.

¹⁸ Khamathang-khamarangli mazangalu. Khangatatei morei kasā hiya awui phasāli masāza̱mana; kha khamathang-khamarangwui khayon chiya a khalattawui phasāli morei kasāna.

¹⁹ Nathumwui phasā hi Varena khami Manglā Kathara nawui wuklungli pamkhavai khorumshimna da nathum matheimalā? Nathum hi nathum khalattawui maningmana kha Varewuina;

²⁰ nathumli aman mida lokhuihaira. Chiwui vang eina nathumwui phasā eina Vareli tekmatei ngasaklu.