1 CORINTHNAO 4 - Kathara Bible (BSI)

Khristawui Paokazatbing

¹ Ithumli Khristawui otram khangatha̱bing kala Varewui kathuka mashun tui horsangmi kahaibingna da phaningphalungra.

² Hikathā otram khangatha̱bingva akhavāwui shitsangkapaibing ngasāphalungra.

³ Nathumna nilala, mikumowui shong eina nilala ili kaphen chiwui vang ina khikha mangangmana, kaja I khalatta bichar masāmana.

⁴ Ina khangui khalāng sākahai I matheimana, kha china I mashungchaowa kaji maningmana. Iwuitungli bichar kasaa chi Prohona.

⁵ Chiwui vang eina retkahai atam chi marāranglakha eina tangda khipālikha bichar masālu, Proho marāranglakha eina tangda ngaraisālu. Chithanghon tangkhamangli thumtit kahaibing kala mibingwui ningli kharin leilaga ngathum kahai saikora phongshokra. Chiwui thili mi kachiva̱ Verewui eina ana masot samphang khangayi chi samphangra.

⁶ Ivānaobing, ina Apollos inili khudam sāda shikachin hi “Kathara tuili kapi kahai athishurda sālu” kaji chānjam chiwui kakhalat chi nathumna iniwui eina tamkhui khavaina. Chieina khipānakha mi akhawui vang langsolaga khangatei akhali matheikhami masāpaimana.

⁷ Khipāna nathumli khangateibingli hakmei ngasakkhala? Nathumwui khalei saikora hi Varena khami maningmalā? Chithākha kathada nathumna samphangda khalei chi lemmet makhaning thada langsopaikhala?

⁸ Nathumwui ningkachāng samphangserhaira! Nathum shāngserhaira! Inina kajimada, nathumva wungnao sāserura! Nathum wungnaolaksi kaje inila nathumli ngasoda mungrumramā!

⁹ Kaja iwui theikakhuili, paokazata ithumliva kathi tandi mikahai mi thada yarui mangāli shaothata, apuk-apakva̱wui kazingraobing kala mibingna ngahorda yangnganao khavai Varena teolak kahaipamli kahai thai.

¹⁰ Khristawui vang eina ithumva mangkhama̱ana, nathumva Khristawui lungli thangkhameiana, kala ithuma khangazanana, nathuma kapangana! Ithumliva chinkai, nathumliva khayāshiya!

¹¹ Aruichangva ithum zākhavai mangkhavai maleimana, chonshi-chonkai ngavai, mina kashaola shaowa, ngayin khavai maleimada zatshang zattai;

¹² kala ringkhavai ot panglāk eina sai, ithumli khonkashi tharan ithumna somi, rekakharek tharan khānga;

¹³ kazei tharan malungkhanim tui eina ngahānkai. Okathui hili ithum hiya horkahai thothapli mamathāmeithuwa.

¹⁴ Nathumli khayakvairanu da hithada kakapi maningmana, kha leikashe inaongarā thada hāngkhamachinna.

¹⁵ Khristawuili nathumli thankhame thingthing leisālala Avāva̱ chiya akhamānga. Khrista Jishuwui mibing nathumli ina paokaphā khuirākhamiwui vang I nathumwui avāva̱ ngasāhaowa.

¹⁶ Chiwui vang eina ina nathumli sāchithei kahai sha̱khuida iwui thada sālu.

¹⁷ Maram hiwui vang eina iwui leikashe kala Proholi ningtongda shitkasanga inao kathā Timothyli chihokharāna. Ina Khrista Jishuli ngarumda kharing mirin kashurlungli iwui pheisin kala chiwui pongli ina church kachiva̱li tamchithei kahai chi nathumli ana phaningung ngasakra.

¹⁸ I marāluimara da nathumwui ngachaili kaikhana phaninglaga langsoi.

¹⁹ Chithālala Prohona mayāmiakha I thākta rārāsāra; kala langkasobing china khamatuimāng maningla khi sāshapkhala kaji rāphākhuihaora.

²⁰ Khikhalajila Vare Wungram hiliva thangkhamei tuili maleimana kha manglāwui pangshapli lei.

²¹ Nathum kachipā ningchangmeikhala? Ili lijei singda rālu jika, malungkhanim leikashi ning eina rālu jikhala?