1 CORINTHNAO 3 - Kathara Bible (BSI)

Varewui Otram Khangatha̱bing

¹ Ivānaobing, kachangkhat ina nathumli Manglā ningrin kazangbingli kahāng thada mahāngrarthura, kha okathuiwui mi, Khristali shitkasanga angangnaobingli kahāng thada hāngrali.

² Ina nathumli zāt khamarar mamizāla seina̱ eina mimangsai, kaja nathum mazātheirangsai. Arui eina tangda mazātheirangli.

³ Khikhalajila arui eina tangda okathuiwui mi thada okthuida lei. Nathum akha eina akha mikpaishida kharar ngaroka, chithākha okathuiwui khangachā sāchingda lei kaji chi hieina matheikhuipaimalā?

⁴ Nathum akhana, “I Paulwuina” kala khangatei akhana “I Apolloswuina” da hāngakha okathuiwui khangachā sāching kaji maningmalā?

⁵ Hānglaksa jiakha Apollos kala Paul khipāda? Nathumna shitsang khavai thankhame ithumva Varewui otram khangatha̱bingmaya. Inila Prohona sālu da khami ot satha̱thui kajina.

⁶ Ina lingsanga, Apollosna tara̱ chaimi, kha Varena kharkhangasakna.

⁷ Chieina lingkasangla, tara̱ chaikhamela khikha maningmana, kha kharkhangasaka Vare china khamataiyana.

⁸ Lingkasanga eina tara̱ chaikhame chi khangatei maleimana; Varena mi ava̱va̱li awui ot kasā athishurda sāman mira.

⁹ Kaja ithum Varewui vang otsakrumabingna kala nathumna Varewui luiyam kala shimna.

¹⁰ Varena ili khami lemmet chiwui athishurda shim sākatha akha thada ina shimphung sema, kala khangatei akhana chiwuitungli shim sākai. Kha kasā mi china ningngasharlak eina sāranu.

¹¹ Kaja Varena Jishu Khristali akhamāng kaje shimphunga sāngasakhaira. Chieina Jishu Khristali sākā kahai chi maningla shimphunga khangatei masākāluipaimana.

¹² Kachikathāna shimphunga chiwuitungli shim sākakāli sinā, lupā, kasaka ngalunggui kala kaikhana thing, khawo, lanji shichinra,

¹³ kha Khristawui Zimikshothang mi ava̱va̱wui otsakwui magun phongshokra; kachangkhat otsak chiwui magun chi mei eina chāng yangra.

¹⁴ Shimphunga chiwuitungli sākā kahai chi meina machuitākha mipā chi sāman samphangra.

¹⁵ Kachikathā miwui otsak chi meina chuitāhaiakha chi awui vang kashimāna, kha a changliva meiwui eina yāmshok kahai thada huimira.

¹⁶ Nathum khorumshimna kala Varewui Manglā nathumwuili lei kaji matheimalā?

¹⁷ Kachikathā akhana khorumshim shimān ngasakakha Verena ali shimān ngasakra. Kaja khorumshim chiya katharana kala nathum awui khorumshimna.

¹⁸ Khipakha kachichā khalatta machipataranu, nathumwui ngachaili kachikathāna thot hiwui thangkhameina da phaningakha, thangmeikachangkhat khavai a mangkhama̱ ngasāranu.

¹⁹ Kaja okathui hiwui thangkhamei hiya Varewui mangāli mangkhama̱na. Hithada kapihaili, “Thangkhameibingwui awor kasā chi Varena paisor eina tukkhuishapa.”

²⁰ Kala khangatei lairikli hithada hānghai, “Thangkhameibingwui kaphaning chi aremana da Prohona thei.”

²¹ Chiwui vang eina sākashap chiwui vang malangsoaranu. Kaja ot saikora nathumwuisera.

²² Paul jilala, Apollos jilala, Cephas jilala, okathui jilala, kharing jilala, kathi jilala, aruihon jilala naoda jilala saikora nathumwuisera.

²³ Kala nathum Khristawuina kala Khrista Varewuina.