1 CORINTHNAO 15 - Kathara Bible (BSI)

Khristawui Ringkhalui

¹ Ivānaobing, ara ina nathumli hāshok kahai paokaphā chi nathumna shitsangda nganingtit kahai chiwui apongli phaningung ngasakngai.

² Ina nathumli hāshok kahai paokaphā chili shitsangtitakha china nathumli huimira. Chi maningsi kaja nathumwui shitkasang chi aremana.

³ Ina samkaphang mataimeikap kaji pao chi nathumli mikhamaronna. Chiya Kathara lairikli kapi kahai thada Khristana ithum moreiwui vang thimi,

⁴ ali chizana kala kakathumathang ringshok ngasaka,

⁵ kala Peterli samphanga, chiwui thili sākhangatha̱ katongali samphanga.

⁶ Chiwui thili awui thikashura shāphangā langdali akhashida samphanga, athumwui ngachaili kaikha thihailala kharing zangkapta lei.

⁷ Chiwui thili Jamesli samphanga, chiwui thili paokazat saikorali samphanga.

⁸ Naomeikapta, kachāng makapeinao kathā ilila samphanga.

⁹ Kaja paokazatbingwui ngachaili I teomeikapa. Varewui churchli yankasaiwui vang ili paokazata dala mahorānmana.

¹⁰ Kha Varewui lukhamashanna ili hokhuida hithada khaleina. Ana hokakhui chi arema maningmana. Lakhashong phaningakha paokazatbingwui ngachaili ina pangmeithuida ot sai. Chi ina kasā maningmana, kha Varewui lukhamashanna sākhangasakna.

¹¹ Chithada sāda iwui eina nijilala, athumwui eina nijilala chi ithum saikorana hākashokna kala chili nathumna shitkasangna.

Ithumwui Ringkhalui

¹² Khrista kathiwui eina ringshoka kaji pao ithumna hāshokta leilaga kathada nathum kaikhana kathebing maringluimara da hāngpairakhala?

¹³ Chi mashungsi kaja Khristala maringshokhaisāmara.

¹⁴ Khrista maringshokhaisāsi kaja ithumna hākashok pao hi aremana kala nathumwui shitkasang eina tangda aremana.

¹⁵ Chili lāngmeida Khristali kathiwui eina ringshok ngasakhaira kaji hi ithumna shākhi sāhaoda, Varewui pongli kakapik thāhaowa, kha kathebing chi maringshokluimana jisi kaja Varena Khristali maringshok ngasakmara.

¹⁶ Kaja kathebing chi maringshokmara jisi kaja Khristala maringshokhaisāmara.

¹⁷ Kala Khristali maringshok ngasakhaisāsi kaja nathumwui shitkasang chi aremana kala nathum moreilungli ngaphumchingda lei.

¹⁸ Chithāsi kaja Khristali shitsangda thikahaibing chila kashimānli tai.

¹⁹ Ithumna Khristali kachihān hi okathui hi eina tangmara jisi kaja okathui hili ithumli lāngmeida chāmkhamei maleiluimara.

²⁰ Kha makhangapata tui chiya Khristali kathiwui eina ringshok ngasakhaira kaji hi kathebingna ringluishitra kajiwui ning nganung khangasakna.

²¹ Mi akhawui eina kathi kaho hi shoka, chithada sāda ringkhalui hila mi akhawui einana.

²² Adamli ngasoda saikora kathi thada, Khristali ngarum kahaiwui vang saikora ringluira.

²³ Kha mi kachiva̱ ringkhalui hi khari khanao ngavāra, chiya rimeikapta Khrista, chiwui thili awui latkharā tharan awui ngasā kahaibing,

²⁴ chiwui thili khangachang atam rāra, chitharan khamungabing, sāshap kala pangshap saikorali Khristana yuihailaga wungram chi Avāva̱ Varewui pāngli horsangmira.

²⁵ Varena yangkashe saikorali yuihaida awui pheinai masāranglakha eina tangda Khristana awunga sāda mungra.

²⁶ Naomeikapta shimān ngasaki kaji yangkashe chi kathi chilina.

²⁷ Hithada kapihaida lei, “Varena ot saikora awui pheizingli haimihaira.” Kha “Ot saikora awui pheizingli haimihaira” kaji hili Vare mazangmana kaji hi tharlak eina thei.

²⁸ Kha Varena ot saikora Khristali yuingasak kahaiwui thili Anaomayara khalatta Vareli hamsangra kala Varena ot saikorawuitungli mungra.

²⁹ Chi maningakha kathebingwui mathun ra̱kahik khuikhamiwui kakhalat khikhala? Kathebing maringphalungluimara jiakha khisāda athumwui mathun sāda ra̱hikmirakhala?

³⁰ Ringkhalui maleimana jiakha khisāda ithumna ka̱lākashi phungchingrakhala?

³¹ Ivānaobing, I thangkachida kathili ngasungchinga. Proho Jishu Khristali ngarumhaoda nathumwui vang ina lāngsongaida hāngkaphatna.

³² Phasāwuishong phaningsi kaje ina Ephesusli shangkha̱li khangama̱ chi khi kannārakhala? Kathe maringluimara jisi kaje mibingna kahāng thada “Akhama thihaola honthei, aja zākhui mangkhuisa” jira.

³³ Maminam ngasakalu, “Makaphā ngasotnaona kaphā mili shimān ngasaka.”

³⁴ Mashun phākhuida morei masāluialu. Nathum kaikhana Vareli makatheiwui vang khayakvairanu da kahāngna.

Ringkhaluiwui Azak

³⁵ Mi akhana, “Kathada kathebingli ringluingasakhala, kachikathā phasārakhala? da ngahānlapai.”

³⁶ He mangkhama̱! Nana khaling atha chi mathiakha makharshokmana.

³⁷ Kala nana khaling chi athāmaya, chi kehulapai, athā khangateilapai, mapung phakahaiya arong maningmana.

³⁸ Kha Varena ngarān kahai athishurda athā kachiva̱wui eina awui arong shonngasaka.

³⁹ Manglākapai saikorawui asā mangaraichāmana, mikumowui ngatei, sāyurbingwui ngatei, vānaobingwui ngatei kala khaihbingwuila ngatei.

⁴⁰ Kazinglila, okathuilila asā khangava lei. Kha khalei ayāyāva̱wui azak khamathā mangaraichasermana.

⁴¹ Zimikwui khamathā akhana, sirābingwui khamathāna ngatei, kala sirā eina sirāla khamathā ngatei ngaroka.

⁴² Kathiwui eina ringkhalui chi chithara. Chizan kahai chi thikapai phasāna kala ringshok kahai chiya mathikapai ngasāhaora.

⁴³ Phasā chi kachizan tharan zakshiya kha ringkhalui tharan tekhamateina.

⁴⁴ Kachizan tharan asā khavai phasāna, ringkhalui tharan manglāwui phasāna. Asā khavai phasā leihaoda manglāwui phasāla vaiphalungra.

⁴⁵ Hithada kapihaida lei; “Mikumo khare Adamli manglākapai akha sāda semkhui” kha khanaowa Adamva kharing khame manglāna.

⁴⁶ Manglāna marimana kha phasāna ri, kala chiwui thili manglāna naowa.

⁴⁷ Ngalei eina sākakhuiya khare Adam hi okathuiwuina, kakhane Adam hi kazingramwui einana.

⁴⁸ Okathuiwui ngasāda khaleibing chiya ngalei eina sākakhuiya ā kathāna, kha kazingramwui chiya kazing eina kharā ā kathāna.

⁴⁹ Ithumla ngalei eina sākakhui mi chiwui azak kakhui thada kazing eina kharā ā chiwui azakla khuira.

⁵⁰ Ivānaongarā, ina kahāng chi hikathāna kaja phasā khavai kala ashee kazang china Varewui wungramli mazangrumpaimara; kala shimānkapai china mashimānkapai masamphangpaimana.

^51-52 Nganālu, kathuka tui akha hāngga; ithum mathisermara kha khanaowa talla̱ kakhong tharan ithum saikorawui azak mikkhayip akhawui lungli onhaora. Kaja talla̱ kakhong tharan kathebing ringshokra, mathiluilakmara kala ithum saikora azak onserhaora.

⁵³ Shimankapai phasā chi mashimānkapai phasā ngasāhaora. Thikapai chi mathikapai onhaora.

⁵⁴ Shimankapai chi mashimānkapai, thikapai chi mathikapai onngasak kahaiwui thili “Kathili khayuiana mayuisanghaira” da kapi kahai chi ungshungra.

⁵⁵ “He kathi, nawui khayui kali lei? He kathi, nawui khaler kali lei?”

⁵⁶ Kathina kathiri hi moreiwui eina samphanga kala moreina awui pangshap ainwui eina samphanga.

⁵⁷ Kha Proho Jishu Khristawui mangā eina yuikhangasaka Vare chili ningshi.

⁵⁸ Chiwui vang eina leikashe ivānaobing, nganingtitlu. Nana Proholi otram khangatha̱ hi arema mangasāmara kaji theida otram khangatha̱li marekta sāchinglu.