1 CORINTHNAO 12 - Kathara Bible (BSI)

Manglāwui Lemmet

¹ Ivānaobing, Manglā Katharawui lemmet pongli nathumna khangahān chi ina nathumli theishingkhui ngasakngai.

² Nathum shitkasanga mi mangasāranglakha manglā makazanga meoma̱bingli khorumda khangui shongfali zatsai kaji nathumna thei.

³ Ina nathumli theishingkhui ngasakngai kaja Varewui Manglāna thankhami mi khipānakha “Jishuli khonkashi ngasāranu” da mahāngngayaomana, kala Manglā Katharana mangasomiakha khipānakha “Jishu hi Prohona” da mahāngphatrarmana.

⁴ Manglārinwui lemmet ngateida ngavai, chi Manglā Katharana khamina.

⁵ Otram khangatha̱ ayur kachungkha lei, kha akhamāng kaje Proholi khangatha̱na.

⁶ Ot kasāli khayar ayur tarākhaya, kha saikora sākhangasaka Vare chiya akhamānga.

⁷ Mi katongawui vang phākhavai mi ava̱va̱li ngasokhami apong ngatateida chitheimi.

⁸ Mi akhali Manglā Katharana thangkhamei mi kala khangatei akhali ngaraikachā Manglā china awor mi,

⁹ khangatei akhali ngaraikachā Manglā china Khristali shitsang khavai pangshap, katei akhali akhamāng kaje Manglā china kazat raimi khavai pangshap,

¹⁰ khangatei akhali matakhak kahai ot sākhavai, khangatei akhali marānkhami, khangatei akhali manglāwuina, maningmana kaji theishap khavai pangshap, khangatei akhali tuiyur matuikashap kala khangatei akhali khalatkashap pangshap mi.

¹¹ Kha hi akhamāng kaje ngaraikachā Manglā china kasāna. Ana ningkachāng athishurda mi kachiva̱li lemmet ngateida mi.

Phasā Akhawui Akai Kachungkha

¹² Phasā akhali akai kachungkha khalei thada kala akai kachungkha chi phasā akhamāngwui kaji thada, Khristawuilila chipapama.

¹³ Manglā akhamāngna ithum saikorali phasā akha sāda ra̱hikmi—kaja Jihudiranu, Gentileranu, raoranu, ningkhān kahaibingranu— ithum saikorali Manglā akhali mangrum ngasaka.

¹⁴ Phasā hi akai akhamāng eina masāmana, kha tarākha eina sākhui.

¹⁵ Pheina, “I pāng maningthukada phasāwui akai maningmana” da kahāng chieina phasāwui akai maningthuwa kaji maningmana.

¹⁶ Kala khanāna. “I mik maningthukada phasāwui akai maningmana,” da kahāng chieina phasāwui akai maningthuwa kaji maningmana.

¹⁷ Phasā katonga mikmāngsi kaja khi eina shaura? Kala khanāsersi kaja khi eina nganamura?

¹⁸ Varena awui ningkachāng athishurda phasālungli akai ngatateida sāmi kahaina.

¹⁹ Saikora chi phasākai akhamāng sāhaosi kaja kachili phasā kaho leirakhala?

²⁰ Hithada sāda akai tarākha leilala phasā akhamānga.

²¹ Mikna pāngli “Ina nali masāvaimana” da mahāngpaimana. Kala kuina pheili, “Ina nali masāvaimana” da mahāngpaimana.

²² Lakhashong phaningakha ngazanmeiya da kaphaning akai chi mazangla ot masāpaimana.

²³ Khayākālak majimana kaji phasākaili khayākashi mida sakta sai kala ngathumki kaje phasākaili sakmeida khui.

²⁴ Chitheikapai akaibingva chi darkar masāmana. Kha teokhamei phasākaibingli hakkhamei khayākakā mida Varena phasā hi ayuk-ayan unglak eina semmi.

²⁵ Chiwui vang eina phasāli ngakai khangarok maleimana, kha akai akhana akhawui vang phaningmi ngaroka.

²⁶ Phasāwui akai akha kazākha saikora chotruma, akai akhali khayākashi miakha saikora mathānruma.

²⁷ Nathum saikora Khristawui phasāna kala nathum chiwui akai ava̱va̱sera.

²⁸ Varena churchwui alungli saikora hi kachichāwui pam ngarānmi: rimeikapta paokazata, kakhaneli marān, kakathumali ojā; chiwui thili matakhak kahai kasaa, chiwui thili kazāt raikhame, ngachonkhame, mawunwo, kala tuiyār tarākha khamatuia kapangsangmi.

²⁹ Saikora paokazatala? Saikora marānla? Saikora ojāla? Mi kachiva̱ matakhak kahai ot saserla?

³⁰ Saikora kazāt raikhami lemmet leila? Saikora tuiyur matuilā? Saikora tuiyur khalatmeserla?

³¹ Kha hili juikhameiya lemmet chili malungchangtha̱lu. Saikorawuitungli mathāmeikapkaje chi hina.