1 CORINTHNAO 11 - Kathara Bible (BSI)

¹ Ina Khristawui acham sha̱kakhui thada nathumnala iwui sha̱khuilu.

Khokharumli Kuikharun

² Nathumna ili mamalailak kaji kala ina tamchithei kahai chiwui athishurda zatching kajiwui vang nathumli masotchikatli.

³ Kha ina nathumli theishingkhui ngasakngai kaja Khristana mi kachiva̱wui akhavāna, gaharana preiva̱wui akhavāna kala Varena Khristawuina.

⁴ Yarui kazipli kuirunlaga seihā kasā kala pao hākashoka mayara chi Khristali maishi khangasakna.

⁵ Kala yarui khokharum kazipli sha̱naona makuirunla seihā kasā kala khamatui chi gaharali maishi khangasakna; makuirunakha ā eina sam sitā kahai sha̱nao chi khangatei maleimana.

⁶ Sha̱naona makuirunakha awui sam chichaphaoranu. Sha̱naowui vang sam sikatā kala kachichāp hi chamkhamalā sāhaogada kuirunphalungra.

⁷ Mayarnaova makuirunmana kaja ava Varewui amahā kala tekhamatei china, kha sha̱naova mayarnaowui tekhamateina.

⁸ Kaja mayarnao hi sha̱naowui eina sākakhui maningmana. Kha sha̱nao hi mayarnaowui eina sākakhuina.

⁹ Mayarnao hi sha̱naowui vang kasā maningmana, kha sha̱nao hi mayarnaowui vang kasāna.

¹⁰ Chiwui vang eina kazingraobingwui vang eina shanaona kuirunngayia.

¹¹ (Chithālala, Prohowuili shanaoranu, mayarnaola kachicha ningkhan masapaimana;

¹² kaja sha̱nao hi mayarnaowui eina sākakhui thada, mayarnao hi sha̱naona kapharāna. Kala ot saikora hi Varena shokkhangasakna.)

¹³ Yarui khokharumpamli sha̱naona makuirunla seihā kasā hi ngayikā mangayikhala kaji nathum khalatta chukmaja̱yanglu.

¹⁴ Mayarnaona sam kaphung hi kakhayak otna da mikumowui khangachānala theingasaka.

¹⁵ Kha sha̱naowui vanga sam kasang hi matha khavaina, awui kuili faror khavai khamina.

¹⁶ Kha hiwui pongli kachikathāna ngayātkhangai leiakha hili lāngda ithumwui alungli kala churchwui khokharumlila khangatei zatkhanā maleiluimana.

Prohowui Phākachizat

¹⁷ Ara ina hāngki kaji hiliya nathumli masongaimana kaja khorum khavai nathumna kakazip tharan phāmei khavai masāla zakshimei khavai sai.

¹⁸ Rimeikapta nathumna church akha sāda kakazip tharan nathumwui ngachaili kaikhangarok lei da ili hānghaira, chi shitsangai.

¹⁹ (Mashunli nganingtit kajebingli ngahāhang eina theipai khavai nathumwui ngachaili kakaila leiphalungda leira)

²⁰ Nathumna kazip khangarum chitharan Prohowui phākachizāt kakhui maningmana.

²¹ Kaja nathumwui phakazāli mangarai ngarokla phazāhaoda kaikhava thomalathao, kaikhava mathothuwa.

²² Nathumwui phāshak phazā khavai shim maleithulā? Chi maningakha nathumna Varewui churchli makachāplā kala kachāmbingli khayak khavai kasāla? Ili khi hānglu jikhala? Hiwui vang nathumli solu kajila? Maningphutmana, masolakmara.

²³ Kaja ina nathumli tamkachithei chi Prohowui eina samkaphangna, kaja Proho Jishuli yorzāthang ngayā Jishuna khamui khuida

²⁴ Vareli ningkashi mijanghailaga serkhaida hānga, “Iwui phasā hi nathumwui vangna, hi ili phaningung khavai sālu.”

²⁵ Chithada sāda zākup kahaiwui thili tengkotla khuida hānga, “Tengkot hi iwui asheeli khalei kadhara tuingashitna. Nathumna hi mangkachida ili phaningung khavai sālu.”

²⁶ Hiwui kakhalata, nathumna khamui shaida kala tengkot hiwui eina mangda Prohona marāranglakha eina tangda awui kathi shākhi kasāna.

²⁷ Chieina kachikathāna mangayila shaiphāphā mangphāphākha Prohowui phasā eina asheeli makhao khangasakwui vang khayon mira.

²⁸ Kachichā khalatta shaingayiya, mashaingayimana kaji machuklaga khamui chi shairanu kala tengkotwui chi mangranu.

²⁹ Kaja kachikathāna khamui kashai kala tengkotwui eina khamang chitharan hi Prohowui phasāna da matheishingkhuila shaiakha kala mangakha a khalattawuitungli bichar sākhavaina.

³⁰ Chiwui vang nathumwui ngachaili kachungkhana khangazanla ngazana, kakazāla kazai, kala kaikha thihaira.

³¹ Kha ithum kachichā khalattana machukkazaklaga shaiakha ithumli bichar masāmara.

³² Okathuili mayonrum khavai Prohona ithumwuitungli pāng parda hāngmachinhaira.

³³ Ivānaobing nathumna Prohowui phākachizāt kasā tharan akha eina akha ngarai ngaroklu.

³⁴ Kachikathāna thaiakha shim eina zāphungda rāranu; chieina nathum saikora kakazip tharan malungkhavāt masamphangmara. Apong khangatateibing chiya I kharā chitharan ngazekminaora.