1 CORINTHNAO 10 - Kathara Bible (BSI)

Meoma̱li Kapha̱li Hāngkhamachin

¹ Ivānaongarā, ina Mosesli kashura ishawo ishayi ngarāli khi shokhaokhala kaji nathumli phaningung ngasakngai. Athum saikorana muiyā chiwui thānkhami samphanga kala ka̱lākashi maleilakla Red Sea kānkai.

² Athum saikora Moseswui thikashura sāda muiyā eina ngayilungli ra̱hika.

³ Athum saikora ngaraikachā manglārinwui kashakazā zai kala tara̱ manga

⁴ kala athumli ngasokazata manglārinwui lunghār chiwui eina athumna khamang samphanga; lunghār chi Khrista a khalattana.

⁵ Chithālala athum kachungkhali Varena mapenthuda siwukli zatlakha athum sorkhangasaili chithithaowa.

⁶ Hi athumwui thada makaphā otli maningchāng khavai ithumwui ngasharkhavaina,

⁷ kala athum kaikha thada meoma̱li mokhorum khavaina. Hithada kapihaili, “Mibing china morsongda pha̱ kathui eina khamathang khamarangwui otla sai”

⁸ Mi kaikhana khamathang-khamarangwui ot kasāwui vang eina thangkhawui alungli mi thing maga̱da kathum thikahai chithada ithumna chikathā ot masāphalungmara.

⁹ Kaikhana Proholi chāng tamkhayangwui vang phara̱na makeithat kahai chithada ithumna Proholi chāng matamyangpaimara.

¹⁰ Kaikhana phenphāphā kajiwui vang kazingraona thingasak kahai chithada, ithumla maphenphāphā phalungmara.

¹¹ Ot saikora hi kateibingli ngayoyang khavai shokkahaina, kala ithumwui vang hāngkhamathin sāda kapi kahaina. Kaja ithum okathui ngachangnanai atamli okthuida leili.

¹² I nganingtitta lei da kaphaninga mi china mokonglui khavai ningngasharanu.

¹³ Nathumna chāng khayang samkaphang kachiva̱ chi mikumoli kharā khangachāna. Kha Varena awui ngashitkhami chi makailakmana kala nathumna maphungrarki kaji chili lāngda ana nathumli chāng mayang ngasakmana. Nathumli chāng khayang chitharan khāngshap khavai ana nathumli pangshap mira kala chili yuishap khavai apong ngarānmira.

Meoma̱li Pha̱kaphayā kala Prohowui Phākachizat

¹⁴ Chiwui vang eina iwui leikashebing, meoma̱li khokharumli mazangalu.

¹⁵ Theikhuishapa mibingli kahāng thada ina khamatuina; ina kahāng hi nathum khalatta chukmaja̱lu.

¹⁶ Prohowui phākachizātli sokhami tengkotwui vang ithumna Vareli ningkashi khami hi Khristawui asheeli khangarumna, kala ithumna khamui serkhaida kashai tharan Khristawui phasāli khangarumna.

¹⁷ Khamuitang akha shaikhangarum thada ithum kachungkhalala asā akhamānga, kaja ithum khamui atang akha shaikhangarumna.

¹⁸ Israelnaobingna kasāsā machukyanglu, pha̱kaphayāwui sā kashaibing chi hanphutpamli ot sākhangarumbing maningmalā?

¹⁹ Ina kahāng hi khikhala da theilā? Meoma̱ kala chili pha̱kahai ot chi khikhikhana kajilā?

²⁰ Maningmana, ina kahāngva, mashitkasangbingwui hanphutli kapha̱ chi Vareli maningla kameoli kapha̱na. Chiwui vang eina nathumli kameoli khangaruma masā ngasakngaimana.

²¹ Nathumna Prohowui tengkot kala kameowui tengkot khanini mamangpaimana. Prohowui khongkhai eina kala kameowui khongkhai khanini mazāpaimana.

²² Ithumna Proholi malungvāt ngasaksilā? Ali ithum pangmeiya da phaninglā?

²³ “Ot saikora sāpaisera” da hānga, chi mashunga, phāser majimana. “Ot saikora sāpaisera” kha katonga kannāser majimana.

²⁴ Khipānakha akhalattawui vang phākhavaimāng maphaaranu, kha khongnainaowui phākhavai sāranu.

²⁵ Nathumwui mashun-makhuiwui vang sāshimli khayora sā chi ningkhamaong maleila kala mangathingla kashai phamei.

²⁶ Kaja hithada kapihaili; “Okathui kala chiwui alungli khalei saikora Prohowuina.”

²⁷ Mashitkasanga akhana phākazā hoda vaakha khuikhamimi chi shailu, ningthar khavaina da mangathingalu.

²⁸ Kha kachikathāna “Hi meoma̱li kapha̱ sāna” da hāngakha nathumli hangkhame mi chiwui mashun-makhui kala ning tharkhavaiwui vang mashaialu.

²⁹ Chi nawui mashun-makhuiwui vang maningla hāngkhamepā chiwui mashun-makhuiwui vangna. Kaikhana “Iwui sākhangai chili mi kateiwui mashun-makhuiwui vang khi khāmkhavai lei;

³⁰ ina Vareli ningkashi mikahai kashakazā chiwui vang mina khi hāngkhavai leikhala?” da hānga.

³¹ Zālala, manglala, kasāsā saikora Vareli tekmatei khavai sālu.

³² Jihudibinglila, Greekbinglila kala Varewui churchlila makhanang ngasakalu.

³³ Ina ot kasā kachiva̱li iwui māng maphāla saikorawui tongzā khavai kala athum ningyāng ungkhavai hotkhana chithada nathumnala sālu, chieina athumli huikhuipaira.