1 CORINTHNAO 1 - Kathara Bible (BSI)

Shālam Tui

¹ Varewui kaphaning athishurda Khrista Jishuwui paokazata sākhavai hokhui kahaia Paul kala ithumwui ivānao Sostheneswui eina

² Corinthli khalei Varewui church, Varewui kathara mi sākhavai hokhui kahaibing saikora, Khrista Jishuli khangarumwui vang Varewui mi sākahaibing kala apam kachiva̱li Proho Jishu Khristali athumwui kala ithumwui Prohonada khokharuma mi saikorali kakapi chithina.

³ Ithumwui Avāva̱ Vare kala Proho Jishu Khristana nathumli lukhamashan kala chingri kahai miranu.

Ningkashi Khami

⁴ Khrista Jishuwui mangā eina nathumli khami Varewui lukhamashan chiwui vang eina nathumwui vang Vareli ningshichinga.

⁵ Kaja Khristali khangarumwui vang nathumwui tuimatuilila, aworwui ponglila Varena nathumli ot saikora khavāt maleila mihaira.

⁶ Khristawui pao nathumwui ningli shāptitmihaira.

⁷ Chiya, ithumwui Proho Jishu Khristawui kharā nathumna honda leilakha Varewui lemmet akhala masamkaphang maleilakmana.

⁸ Proho Jishu Khristawui tekhamatei zimiksho marāranglakha nathumli khayon akhala malei khavai ana nathumli akatang eina tangda nganingtit khavai mayonmira.

⁹ Awui Naomayara, ithumwui Proho Jishu Khristali ngarumsak leikhavai hokhuikhame Vare hiva shitsangkapaiyana.

Church Khokkha Makasā

¹⁰ Ivānaongarā, Proho Jishu Khristawui ming singda nathumli kapona, nathum mayā ngaroklu, makai ngarokalu; kaphaning kala kharin akhamāng leilaga khokkha sāchaolu.

¹¹ Kaja ivānaobing, nathumwui ngachaili kharar khangarok leili da Chloeshi shimkhurwui mi kaikhawui eina tharlak eina shāhaira.

¹² Nathumwui ngachaili “Iya Paulwuina,” “Iya Apolloswuina”; khangateina “Iya Cephaswuina,” kala “Iya Khristawuina” da hāngngaroka ji.

¹³ Khristali ngakaipairalā? Nathumwui vang Paulli krushtungli shaothatlā? Kala nathumli Paulwui ming singda ra̱hikmilā?

¹⁴ Ina Crispus eina Gaius maningla khipālikha mara̱hikmikasāwui vang Vareli ningshi.

¹⁵ Chiwui vang eina nathumli iwui sākhangatha̱ sākhavai ra̱hikkhamina da mi khipānakha mahāngpaimana.

¹⁶ (Oh, malaihaida ina Stephanaswui shimkhurlila ra̱hikmi. Chili lāngda ina khangateili ra̱hikkhami maphaningungmana).

¹⁷ Kaja ra̱hikmi khavai Khristana ili mashirātmana. Khristana krustungli thikhamiwui pangshap chi machāngmāng khavai Paokaphā chi mikumowui thangkhamei tuiyār eina maningla hāshok khavai ana ili kashirātna.

Varewui Pangshap kala Thangkhamei.

¹⁸ Kaja shimānda khalei athumwui vanga krushwui tui hi mangkhama̱ thai, kha huimida khalei ithumwui vanga Varewui pangshapna.

¹⁹ Hithada kapihaida lei; “Ina thangkhameibingwui thangmei chi shimān ngasakra kala kathemabingwui ningkazan chi masāvai ngasakmara.”

²⁰ Chithākha thangkhamei mi kali lei? Kathema kali lei? Mithot hiwui ngaphat ngayātkatheia mi kali lei? Okathuiwui thangkhamei hi mangkhama̱na da Varena chitheihaira.

²¹ Mikumona awui thangkhamei eina Vareli matheikhararwui vang mibingna mangkhama̱na da kakhuia ithumna hākashoka pao hili shitkasanga mibing chili Varena huimi.

²² Kaja Jihudibingna machutkhui khavai matakhak kahai ot ningchānga kala Gentilebingna thangkhamei phai.

²³ Kha krushtungli shaoshān kahaia Khrista chi ithumna hākashokna, chi Jihudibingwui vanga phei ngaphok khavaiwui chānpaona kala Gentilebingwui vanga mangkhama̱ ngasāhaowa.

²⁴ Kha Varena hokhui kahaibingwui vanga Jihudilala, Gentilelala chānpao chi Khrista, Varewui pangshap kala Varewui thangkhamei china.

²⁵ Kaja Varewui mangkhama̱ kathā china mikumowui thangkhameili thangmamei kala awui khangazan china mikumowui pangshapli pangmei.

²⁶ Ivānaobing, nathumli hokakhui tharan kathasākhala kaji phaningyanglu. Mikumowuishong eina yangakha nathumwui ngachaili thangkhameila, pangshap khaleila kala wungnao pharātla machungmana.

²⁷ Kha thangkhameibing khayak khavai okathuina mangkhama̱na da kakhuibingli kala pangshap khaleibing khayak khavai okathuina ngazana da kakhuibingli Varena rinsit eina kapangkhui.

²⁸ Okathuina saklak eina kaphaning chi shimān ngasak khavai, okathuina mayangkasanga kala khikha maningmana da kaphaninga chili Varena kapangkhui.

²⁹ Chiwui vang eina mikumo khipānakha Varewui mangāli malangsopaimana.

³⁰ Varena nathumli Khrista Jishuli ngarum khavai hokhuihaira kala Varena Khrista chi ithumwui thangmei sāngasakhaira. Awui mangā eina ithumli mashungmihaira; ithum Varewui kathara miyur ngasāhaira kala moreiwui eina ningkhān ngasakhaira.

³¹ Chiwui vang kapi kahai thada, “Langso khangayi china Prohowui vang langsoranu.”