ZEKARIA 8 - Biblia Ilagho Jiboie Kwa Wandu Wose

BWANA kulaghira kuiboisa Jerusalemu

¹ BWANA Uwadie-Ndighi-Rose ukaghora nani ini Zekaria ukighamba,

² “Nabwaghwa ni iriso kwa wundu ghwa lukundo niko nalo kwa Jerusalemu, na kwa wundu ugho, nakaia na machu kwa wamaiza wa Jerusalemu.

³ Nichawuya Jerusalemu nikaie aho muzi ghwapo ghwa wueli. Jerusalemu ichamanyika sa muzi ghwa wuloli, na mghondi ghwa BWANA Uwadie-Ndighi-Rose ghuchawangwa mghondi ghwa wueli.

⁴ Waghosi na wakeku witumiagha mizata kwa wughosi ghwawo, wichasea kidombo chienyi ra Jerusalemu.

⁵ Chia ra muzi richachua wadawana na wai wisarighagha andenyi yaro.

⁶ “Ilagho ijo jadima kuwoneka sa jisedimikagha kwa masighariko gha wandu wa matuku agha, ela kwapo ini jadimika.

⁷ Nichawivuvua wandu wapo kufuma kwa agho masanga weredwaloghe,

⁸ na kuwireda kufuma mashariki na magharibi wipate kukaia Jerusalemu. Wichakaia wandu wapo na ini nichakaia Mlungu wawo uwibonyeragha nguma kwa wuloli na kwa hachi.

⁹ “Kaienyi na ndighi! Idana mwawuyasikira malagho gha walodi wereghorieghe ingelo msingi ghwa Hekalu yapo ghorezolwagha kuaghwa sena.

¹⁰ Imbiri ya matuku agho, ndekorekoghe mndungi oredimagha kuandika mundu angu nyamandu kazi, hata ndekorekoghe na wulindiri ghungi ghokulindia na m'maiza. Nerengirieghe ndasanya aghadi ya wandu.

¹¹ Ela nichabonya wuzima kwa awa wandu wisigharikie.

¹² Wandu wichawa kwa sere, mzabibu ghuchava matunda gharo, na ndoe ichachuria mavalo gharo, na vua ichanya; nani nichawibonya awa wandu wisigharikie wipate agha marasimio ghose.

¹³ Inyo wandu wa Juda na Israeli, kokala waghenyi werewasiranagha njowe kwa kughora ‘Wasi ghorewipatireghe wandu wa Juda na Israeli ndeghukupate oho!’ Ela nichamkira, na awo waghenyi wichazerana, ‘Kupate irasimio jerepatiroghe ni wandu wa Juda na Israeli!’ Kwa huwo mkaie na ngolo msakeobua.”

¹⁴ BWANA Uwadie-Ndighi-Rose waghamba, “Iji weke wawayo werenibonyereghe ngajokwa ni machu, nerebonyereghe mipango ya wuwiwi kwawo, nani serewonyeragha wughoma ghungi kwawo.

¹⁵ Ela idana naawuyabonya mipango ewirasimia wandu wapo wa Jerusalemu na Juda. Kwa huwo msakeobua.

¹⁶ Inyo bonyenyi huwu. Mghoriane loli kula mundu na mmbao, tanyenyi loli kotinyi konyu, mrede sere.

¹⁷ Msakebonyerana mipango ya wuwiwi mmbeni na mmbeni. Msakefunya wushuhuda ghwa tee kwa ighemi. Ini nadazamilwa ni kughora tee, kusoweana hachi, na kukoronga.”

¹⁸ BWANA Uwadie-Ndighi-Rose ukaghora na ini Zekaria ukighamba,

¹⁹ “Kufunga tumu kubonyero mori ghwa kana, na ghwa kasanu, na ghwa mfungade, na ghwa ikumi, kuchawuya ndima ra kuseka na kuboilwa kwa wandu wa Juda. Muikunde loli na sere.”

²⁰ BWANA Uwadie-Ndighi-Rose waghamba, “Ngelo ichacha, na wandu wichacha Jerusalemu kufuma mizi milazi.

²¹ Wandu wa muzi ghumu wichawighendia wandu wa muzi mzima wikighamba, ‘Diaendatasa BWANA Uwadie-Ndighi-Rose, na kulomba irasimio jake. Choo dighendanye.’

²² Wandu wengi wa mbari ra wandu wiwadie ndighi, wichacha Jerusalemu kumtasa BWANA Uwadie-Ndighi-Rose na kulomba irasimio jake.

²³ Matuku agho wandu ikumi kufuma kwa mbari ra wandu wichammbwada Myahudi nguwo wikighamba, ‘Nndoko dikanye; dasikire Mlungu oko andwamweri nenyo.’”