ZEKARIA 7 - Biblia Ilagho Jiboie Kwa Wandu Wose

BWANA kutanya kufunga tumu kuseko kwa loli

¹ Ituku ja kana ja mori ghwa ikenda ghuwangwagha Kislevu, mwaka ghwa kana ghwa kubonya nguma kwa Mzuri Dario, BWANA oreghorieghe na ini Zekaria.

² Wandu wa Betheli weredumieghe Shareza na Regem-meleki na wandu wawo Hekalunyi kwa BWANA Uwadie-Ndighi-Rose wilombe irasimio ja BWANA,

³ na kukotia wakohani na walodi ikoto iji: “Welee, dichurie kulila na kufunga tumu kwa wundu ghwa kunonwa kwa Hekalu mori ghwa kasanu, seji diduebonya kwa miaka mingi?”

⁴ BWANA ukanizera huwu,

⁵ “Zera wakohani na waisanga wose kukaia, iji werekoghe wikifunga na kulila mori ghwa kasanu na ghwa mfungade kwa miaka iyo mirongo mfungade, ndewerebonyereghe huwo kwa ishima japo kungi.

⁶ Na iji werejagha na kunywa, wadaaja kwa kukughudisha weni.”

⁷ Agha malagho nigho gheni BWANA oreghighoragha ukitumia walodi wa imbiri, ingelo Jerusalemu erekoghe nicha ichulo ni wandu; ngelo wandu werekoghe wengi wikikaia mizinyi na mbai mbai yaro, na masanga gha kusinyi, na wurindinyi cha magharibi kirimbenyi cha mighondi.

Kulegha kusikira niyo shekeria ya wandu kubarishwa

⁸ BWANA ukaghora na Zekaria ukighamba,

⁹ “Kala nerewinekieghe wandu wapo sharia iri: ‘Mlindie kubonya hachi, mkaie na wughoma mmbeni na mmbeni.

¹⁰ Msewikoronge waka wakiwa, wana wakiwa, waghenyi wiko aghadi konyu, angu mndungi usowagha. Msekaie na njama em'bonyera mndungi kiwiwi chingi.’

¹¹ “Ela wandu wapo wereleghieghe kusikira, wikaghilika, wikafindika madu ghawo wisesikire.

¹² Wikakurisha ngolo rawo sa igho wisesikire sharia, na malagho ghapo agho nereghidumieghe kwa Roho wapo kwa chia ya walodi wa imbiri. Kwa huwo ngajokwa ni machu mabaa.

¹³ Na angu wereleghieghe kusikira iji nereghorieghe nawo, nanimoni ngalegha kusikira iji werelombieghe.

¹⁴ Ngawifunya sa kudukwa ni kiremba ngawisaghisa aghadi ya mbari ra wandu wa masanga gha kighenyi. Iji isanga jiboie jikasighwa iduu jisena wandu.”