ZEKARIA 5 - Biblia Ilagho Jiboie Kwa Wandu Wose

Mawono gha chuo chiburukagha

¹ Nerezighanireghe sena, ngawona chuo chiburukagha!

² Malaika ukanikotia ngera niki nawuyawona. Ngamtumbulia, “Naawuyawona chuo chiburukagha; wulacha ghwaro meta ikenda na wushapa ghwaro meta inya na nusu.”

³ Niko ukanizera, “Chuo ichi chaandikilo njowe ighenjwaghwa isanga jose. Luwaru lumu chaandikilo kula kitoi uchainjwa isangenyi; na luwaru lumu chaandikilo kula mundu ughoragha tee kwa ighemi uchainjwa.

⁴ BWANA Uwadie-Ndighi-Rose waghamba uchaiduma ihi njowe shighadi ingie nyumbenyi kwa kitoi, na nyumbenyi kwa mundu ughemagha kwa tee kwa irina jake; nayo ichakaia nyumbenyi kwawo na kuwinonia vilambo.”

Mawono gha muka uko kikapunyi

⁵ Niko uo malaika oreghorieghe nani ukacha sena ukanizera, “Zighana kuwone ngera niki chija chawuyacha.”

⁶ Nani ngakotia, “Niki chija?” Ukaghamba, “Ni kikapu chiwonyeragha kaung'a iko isangenyi jose.”

⁷ Icho kikapu cherekoghe na kifuniko cha risasi. Nani iji nerezighanireghe ngawona kifuniko chafunukulwa na muka uko kidombo andenyi kikapunyi!

⁸ Malaika ukaghamba, “Muka uhu wakaia fwana ya wuwiwi.” Nao ukamchandiria nokondonyi cha kikapunyi, na kufinikira kifuniko.

⁹ Nao ngawona waka wawi wikiburuka cha kwapo na mawawa ghiwadie ndighi sa gha ichachula. Wikaduka icho kikapu na kuburuka nacho.

¹⁰ Ngamkotia uja malaika, “Icho kikapu wichighenja hao?”

¹¹ Ukanizera, “Wiachighenja Babuloni, wichiaghie hekalu aho. Wikameria kuiagha wichachiwika kikapu andenyi chitasoghe.”