ZEKARIA 2 - Biblia Ilagho Jiboie Kwa Wandu Wose

Mawono gha kamba epima

¹ Nerezighanireghe andenyi ya mawono ghamu ngawona mundu wawadia kamba epima!

² Ngamkotia, “Kwendao?” Ukanitumbulia, “Niaendapima Jerusalemu niwone ngera wushapa ghwaro na wulacha ghwaro ghwang'ane wada.”

³ Niko ngawona uo malaika oreghoragha nani ukicha imbiri, na malaika mzima ukacha kukwana nao.

⁴ Ukamzera mmbao, “Kimbia kumzere uja mdawana uwadie kamba epima kukaia kuchakaia na wandu wengi na mfugho nyingi andenyi ya Jerusalemu risedimagha kuaghilwa wurigha.

⁵ Kwa kukaia ini nichakaia wurigha ghwa modo mbai-mbai ya muzi, nani nichakaia wubaa ghwaro!”

Wandu werebarishiroghe kuwangwa mzawo

⁶ BWANA ukawizera wandu wake, “Choonyi! Choonyi! Kimbienyi mfume isanga ja kaskazinyi; kwa kukaia ni ini BWANA neremsaghisireghe kula andu.”

⁷ BWANA waghamba sena, “Choonyi inyo wandu wa Sioni, fumenyi inyo morekaiagha muzi ghwa Babuloni.

⁸ Kwa kukaia BWANA Uwadie-Ndighi-Rose waghamba huwu aighu ya awo werewusagha vilambo venyu kukaia, uo umuadadagha inyo, uaadada mundu wa iriso japo.

⁹ BWANA moni uchalwa nenyo, nenyo mchasokwa vilambo ni awo morewibonyereghe wadumiki wenyu.” Niko mchaamanya kukaia BWANA Uwadie-Ndighi-Rose wanidumie.

¹⁰ BWANA waghamba, “Borenyi na kuzuma ee wandu wa Jerusalemu, angu nichacha kukaia aghadi konyu.”

¹¹ Ngelo iyo, mbari ra wandu wengi wichamghalukia BWANA na kumrumiria; uchakaia aghadi konyu, nenyo mchamanya kukaia wanidumie.

¹² Juda uchawuya ifungu ja BWANA aighu ya mghondi ghwake ghwa wueli, na Jerusalemu ichakaia muzi ghwake ghukundikie na andu kwake kokaia.

¹³ Wandu wose ndewikaie kima imbiri ya BWANA, kwa kukaia waawuyacha kufuma andu kwake kwa wueli.