ZEKARIA 12 - Biblia Ilagho Jiboie Kwa Wandu Wose

Kukia kuchagha kwa Jerusalemu

¹ Agha ni malagho gha BWANA aighu ya Israeli: BWANA, uo ualie mlungunyi, ukaumba ndoenyi, na kumneka mdamu irangi waghamba huwu:

² “Nichabonya Jerusalemu ikaie sa kikombe cha divei. Mbari riko mbai mbai yaro wichachinywa na kutatarika sa wawongeri. Wikaghurughaia muzi ghwa Jerusalemu, mizi isigharikie ya Juda icharughailwa wori.

³ Ituku ijo jikavika, nichaibonya Jerusalemu ikaie sa igho jilemere kwa wundu ghwa wandu wose; mbari ya wandu wangi wichaatima kujiwusira, wichashoghonoka nandighi. Na mbari ra wandu wose wurumwengunyi wichacha kulwa nayo.

⁴ Ituku ijo, nichangira kiture andenyi ya farasi rawo, nani nichawibonya wajoki farasi wawo wiwuko ni isu. Nichawilindia wandu wa Juda, na kuribwagha meso farasi ra wamaiza wawo.

⁵ Niko vichuku va Juda wichazerana, ‘BWANA Uwadie-Ndighi-Rose waawuyawineka ndighi wandu wake wikaiagha Jerusalemu.’

⁶ “Ituku ijo, nichavibonya vichuku va Juda vikaie sa modo ghuhiagha msidunyi angu mbuwenyi rakaia tayari kukuwidwa; wichawitotesha wandu wa mbari rose riko mbai mbai. Wandu wa Jerusalemu wichasigharika banana andenyi ya muzi.

⁷ “Ini BWANA nichawineka majeshi gha wandu wa Juda wusimi kande, eri ishima ja wusimi jichagha kwa kivalwa cha Daudi na wandu wa Jerusalemu jisechumbe wandu wa Juda.

⁸ Ituku ijo, ini BWANA nichawilindia wandu wikaigha Jerusalemu; hata uo uko mnyonge putu aghadi yawo uchakaia na ndighi sa ra Daudi, na wandu wa kivalwa cha Daudi wichalongoza sa malaika wa BWANA, nawo wichakaia sa Mlungu.

⁹ Ngelo iyo, nichatotesha mbari ya wandu awo wose wichaatima kulwa na Jerusalemu.

¹⁰ “Nichawichura wandu wa nyumba ya Daudi na awo wikaiagha Jerusalemu roho ya wughoma na kulomba. Wichamzighana mundu were'bwahieghe kwa kumdunga na ndagha nawo wichamlilia mwana wa ititi; wichalila na ndighi seji mundu uliliagha mwana wake wa imbiri.

¹¹ Ituku ijo kililo cha Jerusalemu chichakaia kibaa sa kililo cha Hadadi-rimoni wurindinyi ghwa Megido.

¹² Wandu wichalila isangenyi kula nyumba chiaro; nyumba ya kichuku cha Daudi chiaro, na waka wawo chiaro; nyumba ya kichuku cha Nathani chiaro, na waka wawo chiaro;

¹³ nyumba ya kichuku cha Lawi chiaro, na waka wawo chiaro; nyumba ya Washimei chiaro, na waka wawo chiaro;

¹⁴ na nyumba rose rasigharika kula imu chiaro, na waka wawo chiaro.”