ZABURI 97 - Biblia Ilagho Jiboie Kwa Wandu Wose

Mlungu, M'bonyi nguma m'baa

¹ BWANA ni mzuri, wandu wa ndoenyi ndewizume; masanga gha pwani ndeghiboilo!

² Mawingu na kira kibaa vammara chia rose, wabonya nguma kwa hachi na loli.

³ Modo ghwamkiria, na kuwikora wamaiza wake chia rose.

⁴ Chuhehia rake raghulangalishira wurumwengu; ndoenyi kwawona na kusughusika.

⁵ Mighondi yasagha sa sungu imbiri ya BWANA; yasagha imbiri ya Bwana wa ndoenyi kose.

⁶ Mlungunyi kwaeresha hachi yake, na wandu wose waghuwona wubaa ghwake.

⁷ Watasi milimu wose wikukasagha na milimu isewadie fwaida ingi wafushwa waya; milungu yose yadaghoghoma imbiri ya BWANA.

⁸ Wandu wa Sioni wasikire wikaboilwa, na mizi ya Juda ikakaia na iseko kwa wundu ghwa kutanya kwako ee BWANA.

⁹ Oho BWANA koko aighu nandighi kuchumba ndoenyi kose. Koko ighu na ndighi kuchumba milungu yose.

¹⁰ Awo wimkundagha BWANA, wizamilo ni kiwiwi; wadawilindia waeli wake, na kuwikira na wawiwi.

¹¹ Wahachi walangalishirwa mwengere, na awo wiko na ngolo ndicha waboilwa.

¹² Inyo wahachi boilonyi andenyi ya BWANA, na kumfunyira chawucha uo Mlungu wa wueli.