ZABURI 94 - Biblia Ilagho Jiboie Kwa Wandu Wose

Mlungu, uo Mtanyi wa wose

¹ Ee BWANA, oho ko Mlungu oluya lugho; wonyera machu ghako.

² Oho ko mtanyi wandu wose; wuka kuwilipe wang'eti agho ghiwifwanagha.

³ Wawiwi wiboilwa hata lii? Wiboilwa hata lii BWANA?

⁴ Wabonyi kiwiwi wadeda malagho ghawo gha kukukasa, wose weechulwa ni kukukasa.

⁵ Watirira wandu wako ee BWANA, na kuwikoronga wandu wa ifwa jako.

⁶ Wawibwagha waka wakiwa, na waghenyi, na wana wakiwa.

⁷ Waghamba, “BWANA ndediwonagha, Mlungu wa Israeli ndemanyagha.”

⁸ Inyo wandu msowie akili tambukilonyi! Wakelu, ni lii mchaakufundisha?

⁹ Mlungu uumbie madu ulemwa wada ni kusikira? Uo uumbie iriso, ulemwa wada ni kuwona?

¹⁰ Uo urikaniagha mbari zima kwa kuwikaba, ulemwa wada ni kukania? Uo ufundishagha wandu kumanya, uo ndena kumanya?

¹¹ BWANA waichi maghesho gha wadamu, kukaia, awo ndewiwadie kumanya kungi.

¹² Warasimilwa uo mundu kumkaniagha kwa kumkaba ee BWANA, uo kumfundishagha Sharia yako.

¹³ Kwadamneka wuhoreshi ngelo ya wasi, hata kina chikoto kwa wundu ghwa wawiwi.

¹⁴ BWANA ndechaawisigha wandu wake, hata ndechaada ifwa jake anduangi.

¹⁵ Hachi ichafunukulwa ni Watanyi, na wandu wa ngolo ndicha wichainugha.

¹⁶ Nani uchaakufunya unitesie kulwa na wawiwi? Nani uchaanitesia kulwa na wabonyi kiwiwi?

¹⁷ Ngera BWANA usereniteserieghe, kumangu namerie kughenda shwa cha isanga ja awo winyamishiro ni kifwa.

¹⁸ Ingelo neregheshereghe, “Naawuyadenderuka,” koreniwadieghe kwa lukundo lwako lukatie ee BWANA.

¹⁹ Ingelo nakambwa ni chongo kwa malagho mengi, kwadanihoresha na kunibonya niboilo.

²⁰ Welee, wabonyi nguma wawiwi, awo wibonyagha sheshe kwa kutumia sharia, wadima kuwadana na oho?

²¹ Wawadana chiaimweri kulwa na mundu wa hachi na kumtanya mundu usewadie ikosa jingi ubwagho.

²² Ela BWANA ni mlindiri wapo na mtesia wapo.

²³ Uchawikaba kwa wundu ghwa mawiwi ghawo, na kuwitotesha kwa wundu ghwa kaung'a rawo; BWANA Mlungu odu, uchawitotesha.