ZABURI 9 - Biblia Ilagho Jiboie Kwa Wandu Wose

Kumfunyira Mlungu chawucha kwa wundu ghwa kutanya kwake kwa hachi

¹ Nichakufunyira chawucha oho BWANA kwa ngolo yapo yose. Nichaghora malagho gha mabonyo ghako gha mashiniko.

² Nichaboilwa na kuzuma andenyi kwako, nichakuboria makaso, ee Mlungu kuko Aighu-Na-Ndighi.

³ Wamaiza wapo wikakuwona wichaghaluka nanyuma; wichaghwa andonyi na kufwa.

⁴ Kwaserie kidombo aighu ya kifumbi cha nguma, kutanya hachi, kukanitanya kwa hachi.

⁵ Kwamerie kurikemia mbari zima, kukawisaghisa wawiwi; kwajivutire irina jawo, kwa kala na kala.

⁶ Wamaiza wedu wamerie kunonwa na kusagha kwa kala. Kwainonie mizi yawo, hata ndeiduaakumbukwa sena.

⁷ Ela BWANA wadabonya nguma kwa kala na kala; wachiwika tayari kifumbi chake cha nguma upate kutanya.

⁸ Uchaghutanya wurumwengu kwa loli, na kuwibonyera wandu nguma kwa hachi.

⁹ BWANA nuo andu kokimbiria kwa uo ukorongwagha, ni ngome imange ngelo ya wasi.

¹⁰ Na awo wikuichi wadakusaghika kwako, angu oho ee BWANA ndekuwisighie awo wikulolagha anduangi.

¹¹ M'borienyi makaso uo BWANA ukaiagha Sioni! Wighorienyi wandu mabonyo ghake!

¹² Mlungu wadawikumbuka awo wijagha wasi; ndeliwagha kililo chawo, nao wadawikaba awo wiwikorongagha.

¹³ Kuniwonie wughoma ee BWANA! Wona seji nawuyajishwa wasi ni wandu wizamilwagha ni ini. Nivuvuo kufuma kifonyi ee BWANA,

¹⁴ eri nipate kughieresha makaso ghako, andenyi ya muzi ghwa Jerusalemu; na aho niboilo andenyi ya kukia kwako.

¹⁵ Wandu wa mbari zima werechunukieghe kinenyi; icho werechikotereghe; maghu ghawo ghikawadwa ni nyavu wereideghieghe.

¹⁶ BWANA wakumanyishire moni kwa kutanya kwake kwa hachi, wawiwi wawadwa ni mabonyo ghawo gheni.

¹⁷ Wawiwi; awo wandu wose wimliwagha Mlungu, wichaghenda Andu kwa Wafu.

¹⁸ Awo wandu wisowagha, ndewichaaliwa ngelo rose, na isuwirio ja wakiwa ndejichaalaghaya putu anduangi.

¹⁹ Wuka ee BWANA! Kusesighe mndungi usime; wandu wa mbari zima ndewitanyo imbiri kwako.

²⁰ Kuwioboshe ee BWANA! Kuwibonye wandu wa mbari zima wimanye kukaia awo ni wandu tu.