ZABURI 88 - Biblia Ilagho Jiboie Kwa Wandu Wose

Kililo chelomba wutesia

¹ Ee BWANA Mlungu wapo, nakulilia kio na dime ngilomba wutesia.

² Sikira ilombi japo, nideghie kudu naawuyakema.

³ Naja wasi nandighi; neko kaavui na kufwa.

⁴ Natalilo aghadi ya awo wifwagha; ndighi ranisiria putu.

⁵ Needeghwa sa mundu ufue, sa awo wibwaghilo wikarikwa kaburinyi, kusewuyaawikumbuka sena, hata kusewuyaa witesia sena.

⁶ Kwanikumba andenyi ya kaburi ikambie kira, andu kuko ndenyi kwa kira.

⁷ Kwakaia na machu mabaa aighu yapo; kwanikoronga na mivo-mivo yaro.

⁸ Kwabonyere waghenyi wapo wikanilegha, kukawibonya winiwone sa kilambo cheobolwa. Narughilwa, nani sidimagha kufuma;

⁹ niawona mira mira kwa wundu ghwa wasi. Nadakuwanga kula ituku ee BWANA, ngighorua mikonu yapo cha kwako.

¹⁰ Welee, kwabonyagha weke mwakilimbiti kwa wundu ghwa wafu? Welee, wadima kuwuka wikukase?

¹¹ Welee, lukundo lwako lukatie lwadima kughorwa kaburinyi, angu wuloli ghwako kughorwa kwa Mnoni?

¹² Welee, weke mwakilimbiti wako wamanyikagha kirenyi, angu hachi yako kumanyika isanga ja wandu wiliwikie?

¹³ Ela ini ee BWANA, nadakulilia oho, malombi ghapo ghadakuvikia nakesho.

¹⁴ Ee BWANA, kwaki kunileghagha? Kwaki kusekunde kunizighana?

¹⁵ Nadakorongwa kaavui na kufwa kufuma wanake ghwapo; nabwaghwa ni wowa ghwa kukaba kwako; nisedimagha kukutesia nimoni.

¹⁶ Machu ghako ghanilemeria, kiture chako chanitotesha.

¹⁷ Vanimara chia rose dii sa machi mengi, vanikwanyikia chiaimweri.

¹⁸ Kwabonyere mkundwa na mghenyi wapo wikanilegha, wangara wapo ni kira cheni.