ZABURI 81 - Biblia Ilagho Jiboie Kwa Wandu Wose

Lumbo lwa Ndima

¹ M'borienyi Mlungu mlindiri odu kwa kuboilwa; m'borienyi makaso uo Mlungu wa Jakobo.

² Zoenyi kubora kwa kukaba mayanga, zeze, na kinubi cha lwaka lusingie.

³ Kabenyi tarumbeta ngelo ya Ndima ya Mori Lukombe, na ya Mori M'baa.

⁴ Ihi ni sharia ya Israeli, na malaghiro gha Mlungu wa Jakobo.

⁵ Odeiwika ikaie momu kwa wandu wa Israeli, ingelo orekabagha isanga ja Misri. Nasikira lwaka niseluichi lukighamba,

⁶ “Nerekudueghe msigo ghorekoghe iongenyi kwako; ngakudua matofali koreghidukagha.

⁷ Iji korekoghe na wasi korewangieghe ngakukira; nerekukirieghe nikuvisire andenyi ya iwingu ja lukuwa; nerekutimieghe aho machinyi gha Meriba.

⁸ Sikirenyi, nim'wonyere ee wandu wapo, yakaiagha nicha saki ngera kwadanisikira ee Israeli!

⁹ Ndekuchaakaia na mlungu ghungi ghwa kighenyi aghadi kwako; kusetase mlungu ghwa kighenyi.

¹⁰ Ini ne BWANA Mlungu wako, uo orekufunyireghe isanga ja Misri. Tambarua momu ghwako, nani nichakujisha.

¹¹ “Ela wandu wapo ndewerenisikireghe, Israeli nderenitalieghe anduangi.

¹² Kwa huwo nerewisighieghe wikaie wighilikie, na kubonya seji wikunde.

¹³ Yakaiagha nicha saki ngera wandu wapo wadanisikira, na Israeli ubonye seji nikunde!

¹⁴ Nadawikaba wamaiza wawo shwa wori, na kuwisima.

¹⁵ Awo wizamilwagha ni ini, wichanighoghomia; ikabo jawo jichadua kwa kala na kala.

¹⁶ Ela oho nichakujisha viro viboie kuchumba, na kukughudisha na wuki ghufumagha ighonyi.”