ZABURI 71 - Biblia Ilagho Jiboie Kwa Wandu Wose

Ilombi ja mghosi

¹ Nakukimbiria oho ee BWANA, jingi kusakenisigha nifusho waya.

² Kunivuvuo na kunikira kwa hachi yako; kunideghie kudu kwako, na kunikira.

³ Kukaie kwapo mbanga ekimbiria, ngome imange enikira, angu oho ko mbanga yapo na ngome yapo.

⁴ Kunikire na mundu mmbiwi ee Mlungu wapo; kunikire na ndighi ra mkinyanya na mng'eti.

⁵ Oho BWANA ko isuwirio japo; nadakurumiria kufuma wanake ghwapo, ee BWANA.

⁶ Nadakusaghika kwako kufuma wanake ghwapo; ni oho korenifunyireghe kifunyi kwa mao. Nichakukasa oho tulituli.

⁷ Ini nakaie sa kilambo cheshinikilwa kwa wengi, ela oho ko andu kwapo kumange kokimbiria.

⁸ Nachulwa ni makaso ghekukasa oho, na kughueresha wubaa ghwako dime dii.

⁹ Kusakenida ngelo ya wughosi ghwapo, kusakenilegha ingelo ndighi rapo rasia.

¹⁰ Wamaiza wapo waawuyanideda, awo waawuyanilaliria wikibonya njama enibwagha.

¹¹ Waghamba, “Mlungu wamsighie; dimnughe dimmbwade angu ndena mndungi omkira.”

¹² Ee Mlungu, kusakekaia kula nani; ee Mlungu wapo shashira kunitesie.

¹³ Washitaki wapo, ndewifusho waya na kusia putu, na awo wilolagha kunibonya kiwiwi, ndewifusho waya na kuinjirwa ishima.

¹⁴ Ela ini nichakusuwiria tuli tuli, na kuchuria kukukasa.

¹⁵ Nichaghora malagho gha mabonyo ghako gha hachi, na gha kukia kwako dime dii, angu ghakaia mengi nisedimagha kughitala.

¹⁶ Nichacha na kughieresha mabonyo ghako gha ndighi ee Bwana MLUNGU, nani nichaieresha iyo hachi yako cheni.

¹⁷ Kwanifundishire kufuma wanake ghwapo ee Mlungu, nani naduagha ngighora malagho gha mabonyo ghako gha mashiniko.

¹⁸ Idana kusakenisigha ee Mlungu, hata ngera naghosia na kubuka imbu; kaia andwamweri nani ngiwighoria wandu wa kivalwa chichagha malagho gha ndighi rako.

¹⁹ Hachi yako ee Mlungu, yavika koighu mawingunyi. Nani uko sa oho ee Mlungu, kubonyere malagho mabaa huwu?

²⁰ Oho kunibonyere ngapatwa ni wasi na matiriro, kuchaniwusira sena. Kuchanifunya sena kufuma andu kuko ndenyi kwa ndoe.

²¹ Kuchanibonya nikaie m'baa kuchumba, na kunihoresha ngolo.

²² Nichakukasa kwa kinubi kwa wundu ghwa wuloli ghwako ee Mlungu wapo. Nichakuboria chumbo kwa zeze, ee Mweli wa Israeli.

²³ Nichakuzumia kwa kuboilwa ngikukasa kwa chumbo; nichakukasa angu kunivuvue.

²⁴ Nichaja malagho gha mabonyo ghako, ghwa hachi dime dii; angu awo werekoghe wikilola kunibonya kiwiwi, wamerie kunonelwa ishima, na kufushwa waya.