ZABURI 7 - Biblia Ilagho Jiboie Kwa Wandu Wose

Kulombia hachi

¹ Nakukimbiria oho ee BWANA Mlungu wapo, nikire kunivuvuo kufuma kwa wandu wose winiwingagha,

² wisechenirashua sa shimba na kunikurudua hata nisowe mndungi onivuvua.

³ Ee BWANA Mlungu wapo, ikakaia nimkosere mndungi,

⁴ ikakaia nim'bonyere mghenyi wapo kiwiwi, angu kumsoka m'maiza wapo kuseko na hachi,

⁵ m'maiza wapo ndeniwinge uniwade, unighushe andonyi, na kunibwagha. Unisighe andonyi nifue.

⁶ Wuka kwa machu ghako ee BWANA, wuka kutangale lubio lwa wamaiza wapo. Wuka ee Mlungu wapo, kuwikie kutanya.

⁷ Wandu ndewikukwanyikie, na oho kuwibonyere nguma kufuma aighu.

⁸ BWANA kwawuyatanya wandu; kunitanye ee BWANA, kunughana na hachi yapo; kunughana na wucha ghuko andenyi kwapo.

⁹ Ee Mlungu wa hachi, kuzighanagha nia na ngolo ra wandu; meria kiwiwi cha wandu wizamie, na kuwimangisha wahachi.

¹⁰ Wulindiri ghwapo ghooka na Mlungu; wadakira wandu wecha.

¹¹ Mlungu ni mtanyi wa hachi; nao wadawoyera lubio lwake kula ituku.

¹² Mundu ukalegha kuhea, Mlungu uchakalisha lufu lwake; wameria kuifunga ndana yake.

¹³ Wameria kuboisa maswagha ghake ghebwagha, na kubonya mawanu ghake ghikaie gha modo.

¹⁴ Mundu mmbiwi wadaghesha wuwiwi, wadabonya mipango ebonya wuwiwi toe na kudunga tee.

¹⁵ Wadakota kina, na kuchunukia andenyi ya icho kina moni.

¹⁶ Mawiwi ghake ghadammburia moni, na lung'eto lwake lwadamghalukia moni.

¹⁷ Nichamfunyira BWANA chawucha, angu ubonyere hachi yake; nichabora makaso kwa BWANA, Uo-Uwadie-Ndighi-Rose.