ZABURI 52 - Biblia Ilagho Jiboie Kwa Wandu Wose

Kutanya kwa Mlungu na mvono ghwake

¹ Kwaki kukukasagha na wuwiwi ghwako ee mundu kuwadie ndighi, kukighamba wei lukundo lwa Mlungu ni lwa matuku ghose aighu kwako?

² Kwadabonya mipango enona wambenyu. Lumi lwako looka sa shembe ikalie; matuku ghose kwadadunga tee.

³ Kwadakunda wuwiwi kuchumba wucha, na kughora tee kuchumba kughora loli.

⁴ Kwadakunda kutotesha wandu, na malagho ghako oho mtee.

⁵ Ela Mlungu uchakutotesha kwa kala na kala; uchakufunya mzinyi kwako na kukurashua, nao uchakuinja isangenyi ja wandu wiko moyo.

⁶ Wahachi wichawona na kuobua, nawo wichakuseka wikighamba,

⁷ “Wonenyi mundu uleghie kum'bonya Mlungu ukaie andu kwake kokimbiria; ukadakusaghika na wungi ghwa mali rake, na kukusaghika na wuwiwi ghwake.”

⁸ Ela ini neeka sa mzeituni mmbishi, andenyi ya nyumba ya Mlungu. Nadalusuwiria lukundo lwa Mlungu lukatie kwa kala na kala.

⁹ Nichakufunyira chawucha matuku ghose, kwa wundu ghwa agho kubonyere ee Mlungu. Nichajighora irina jako icha imbiri ya wandu wako.