ZABURI 5 - Biblia Ilagho Jiboie Kwa Wandu Wose

Kulomba wulindiri

¹ Degha madu kusikire malagho ghapo ee BWANA, sikira kuruma kwapo.

² Sikira lwaka lwa kililo chapo, ee Mzuri wapo, na Mlungu wapo; angu ni oho nawuyakulomba.

³ Kwadasikira lwaka lwapo nakesho ee BWANA. Nadabonya malombi luma lwa nakesho na kuweseria, na kuzighanira.

⁴ Oho ndekuko Mlungu oboilwa ni wuwiwi, wuwiwi ndeghukaiagha kwako anduangi.

⁵ Wandu wikukasire ndewidimagha kukaia kimusi imbiri kwako, oho kwadazamilwa ni awo wose wibonyagha kiwiwi.

⁶ BWANA, kwadawitotesha awo wighoragha tee; BWANA kwadazamilwa nandighi ni wabwaghi wandu, na wandu wa mikalo.

⁷ Ela ini, kwa wundu ghwa wungi ghwa lukundo lwako lukatie, nichangia Hekalunyi kwako. Nichatasa ngiilangaya Hekalu yako ya wueli, ngikuneka ishima.

⁸ Kunilongoze kwa hachi yako ee BWANA, angu neko na wamaiza; kuibonye chia yako ikaie ighorokie nipate kuinugha.

⁹ Wamaiza wapo ndewighoragha loli, wadakunda tu kunona, malagho ghawo gha mikalo ghashekeria wandu kufwa, chumi rawo rachua mikalo.

¹⁰ Kuwitanye kukaia wakosi ee Mlungu, kuwibonye wighusho ni njama rawo reni; kuwikumbe noko, kwa wundu ghwa makosa ghawo mengi, angu wakuleghie.

¹¹ Ela wose wikukimbiriagha, ndewiboilo; ndewibore kwa kuboilwa matuku ghose. Na oho kuwidederia, Kuwilindie, eri awo wikukundagha; wipate kuboilwa andenyi kwako.

¹² Angu oho kwadamrasimia mhachi ee BWANA, kwadamfinikira wucha, sa kumlindia na ngao.