ZABURI 43 - Biblia Ilagho Jiboie Kwa Wandu Wose

Ilombi ja mundu uko wubarishonyi

¹ Kunitale kukaia na hachi ee Mlungu, kunidederie imbiri ya wandu wisekuichi; kunikire na wandu wa mikalo na awo wisewadie hachi.

² Oho ko Mlungu nikukimbiriagha, kwaki kwanilegha? Kwaki niendaa ngilila kwa kukorongwa ni wamaiza?

³ Reda mwengere ghwako na loli yako vinilongoze; vinighenje hata mghondi ghwako ghwa wueli, andu kukaiagha.

⁴ Niko nichaghenda madhabahunyi kwako ee Mlungu, oho kuko kuboilwa kwapo kubaa; nani nichakukasa kwa kinubi, ee Mlungu, Mlungu wapo.

⁵ Kwaki nijagha wasi huwu na kusumbuka? Nichawika isuwirio japo kwa Mlungu, nani nichamkasa sena Mkiri wapo na Mlungu wapo.