ZABURI 42 - Biblia Ilagho Jiboie Kwa Wandu Wose

CHUO CHA KAWI ( Zab. 42–72 ) Ilombi ja mundu uko wubarishonyi

¹ Seji sarigha isodaa-soda ikikaia na bea ya machi gha moda, niko koni niko na bea na oho ee Mlungu.

² Nakaia na kau ya Mlungu, uo Mlungu uko moyo. Niendammbona Mlungu lii?

³ Naawuyalila kio na dime, na mbori rawuya vindo vapo wandu wikinizera, “Mlungu wako oko hao?”

⁴ Nakumbuka niko na wasi ngolonyi, seji niduelongoza izungu ja wandu kughenda nyumbenyi kwa Mlungu. Longo lwa wandu wengi wiwadiagha mizango ya ndima; wikibora na kuzuma na kufunya chawucha kwa Mlungu.

⁵ Kwaki nijagha wasi huwu na kusumbuka? Nichawika isuwirio japo kwa Mlungu, nani nichamkasa sena Mkiri wapo na Mlungu wapo.

⁶ Nawuyaja wasi; kwa huwo nakukumbuka oho niko isanga ja Jordani, na Hermoni, na Mghondi ghwa Mizari.

⁷ Ndiwa na ndiwa riawangana, rikighona; kwaiduma iyo mivo-mivo na kusalama kwa machi kuide aighu yapo.

⁸ BWANA wadawonyera lukundo lwake lukatie nadime; nakio nadakaia na lumbo lom'boria; ilombi kwa Mlungu wa irangi japo.

⁹ Nadamzera Mlungu, uo mlindiri wapo, “Kwaki kwaniliwa? Kwaki niendaa ngilila kwa kukorongwa ni m'maiza?”

¹⁰ Wamaiza wapo wanidukana na kunivavira sa kunibara maindi, wikinikotia ngelo rose, “Mlungu wako oko hao?”

¹¹ Kwaki nijagha wasi huwu na kusumbuka? Nichawika isuwirio japo kwa Mlungu, nani nichamkasa sena Mkiri wapo na Mlungu wapo.