ZABURI 22 - Biblia Ilagho Jiboie Kwa Wandu Wose

Kililo cha kuwawa na lumbo lwa kukasa

¹ Mlungu wapo, Mlungu wapo, kwaki kwanisigha? Kwaki kwakaia kula kuruma kwapo huwu kusenitesiagha?

² Ee Mlungu wapo, nakema nadime, ela ndekuwuenitumbulia; hata nakio, ela siwuehoreshwa.

³ Ela sena oho koko uja Mweli, kuserie kifumbinyi cha nguma kupate kukaswa ni Israeli.

⁴ Weke aba werekusaghikieghe kwako; werekusaghikieghe kwako, na oho kukawikira.

⁵ Werekulilieghe, wikakia; werekusaghikieghe kwako, nawo ndewerefushiroghe waya anduangi.

⁶ Ela ini ne mng'ori, se mdamu ungi anduangi; niasekwa na kumenywa ni wandu.

⁷ Wandu wose winiwonagha, wianizoma; wanikuchira memu na kusughusa vongo vawo wikighamba,

⁸ “Oremrumirieghe BWANA, oke ndemkire, ndemvuvuo angu um'boiagha!”

⁹ Ela sena ni oho korenibonyereghe ngavalwa, kukanilindia ngelo nerekoghe ngionga.

¹⁰ Nedewikwa kwako kufuma kuvalwa kwapo; oho ko Mlungu wapo kufuma navalwa.

¹¹ Kusekaie kula nani, angu wasi ghoko kaavui, na mndungi otesia ndeuko.

¹² Wamaiza wanimara chia rose sa njau, wakaia sa njau riwadie ndighi rifumie Bashani;

¹³ waniasamia memu yawo sa shimba irurumagha, ikunde kunirashua.

¹⁴ Ndighi rapo ranisia sa machi ghadilwa andonyi; maindi ghapo ghose ghawinika, na ngolo yapo yakaia sa sungu yasagha andenyi kwapo.

¹⁵ Irangi japo jaoma sa luwigha; lumi lwapo lwakakadiana na lwasasa, na oho kwanirarisha terinyi nifue.

¹⁶ Bonjo ya wandu wawiwi yanimaria chia rose, yanikwanyikia na kunisoghodera sa koshi; wadunga mikonu yapo na maghu ghapo.

¹⁷ Nafumwa ni maindi, ghadima kutalika ghose; wanizighana na kunikuya meso;

¹⁸ wawaghiana marwao ghapo, na nguwo yapo waikabia kura.

¹⁹ Ela oho ee BWANA kusekaie kula nani; mtesia wapo, shashira kunitesie.

²⁰ Kunikire na lufu, kira irangi japo na ndighi ra koshi.

²¹ Kunivuvuo momunyi ghwa shimba, vuvua roho yapo yawuyatirirwa ni mbembe ra mbogho.

²² Nichawighoria wanidu malagho kubonyere, na kukukasa andenyi ya ikwanyiko.

²³ Inyo mumuobuagha BWANA, mkasenyi; inyo mmbose kivalwa cha Jakobo, mnekenyi wubaa; mmbukienyi kimusi kwa ishima inyo mmbose wandu wa Israeli.

²⁴ Kwa kukaia ndemenyere angu kuzamilwa ni makorongo gha uo ukorongagha; ndereleghieghe kumzighana, ela iji oremlilieghe, ukamsikira.

²⁵ Nichakukasa andenyi ya ikwanyiko ibaa, kwa wundu ghwa agho kubonyere; nichafunya vizongona nilaghirie, imbiri ya awo wikutasagha oho.

²⁶ Wakiwa wichaja na kughuda; awo wimlolagha BWANA, wichamkasa. Awo ndewiduo kwa kala na kala.

²⁷ Mbari rose ra wandu richamkumbuka BWANA. Wurumwengunyi kose, wandu wichamghalukia uo, na vinyumba vose va wandu vichamtasa.

²⁸ BWANA nuo mzuri; nao wadaribonyera nguma mbari rose ra wandu.

²⁹ Wandu wose wa ndoenyi wikukasire, wichamghoghomia; awo wose wifwagha wichamdungia ngokoro hee, hata uo usedimagha kukuwika moyo moni.

³⁰ Kivalwa chichagha chichamdumikia, wandu wichachighoria kivalwa chichagha malagho gha BWANA;

³¹ wichachila malagho gha kukia kwake, kwa wandu widuagha wisevalo; kukaia, “BWANA wakirie wandu wake.”