ZABURI 18 - Biblia Ilagho Jiboie Kwa Wandu Wose

Lumbo lwa Daudi lwa wusimi

¹ Ee BWANA ndighi rapo, nakukunde nandighi.

² BWANA mlindiri wapo; ni ngome yapo na mkiri wapo. Mlungu wapo ni mlindiri wapo nimkimbiriagha. Uo ni sa ngao yapo, na Mkiri wapo uwadie ndighi; nuo andu kwapo kokimbiria.

³ Nadammbanga BWANA, uo ufwanagha kukaswa, nao wadanikira na wamaiza wapo.

⁴ Ndengwa ya kifwa erenimarieghe chia rose, mivo-mivo ya kutota ikaniidia aighu.

⁵ Nerecheloghe ni ndengwa ya kifwa, na shaghala ra kifwa rikakaia imbiri kwapo.

⁶ Neremmbangieghe BWANA, niko andenyi ya wasi ghwapo, ngamlilia Mlungu unitesie. Ukasikira lwaka lwapo uko Hekalunyi kwake, na kililo chapo chikamvikia.

⁷ Niko ndoenyi kukatatarika na kunenganenga, misingi ya mighondi wori ikasughusika na kuzingizika; kwa kukaia BWANA orejokeloghe ni machu.

⁸ Mosi ghukafuma mbuonyi kwake, modo ghulunguragha na maka ghiakagha ghikafuma momunyi kwake.

⁹ Oreikieghe mawingunyi, ukasea andoenyi, na kira kibaa chikambie cherekoghe maghunyi kwake.

¹⁰ Ukajoka aighu ya ikerubi, ukaburuka; ukaghenda shwa-shwa aighu ya mawawa gha mbeo.

¹¹ Orekuvisireghe kirenyi; mawingu ghikambie ghichue machi, ghikammara chia rose.

¹² Kuja kung'ala-ng'ala kwa mwengere ghwake, korefunyireghe vua ya magho na luhehia mawingunyi.

¹³ Niko BWANA ukadeda sa lukuwa mawingunyi, Uo-Uko-Aighu-Nandighi ukafunya lwaka; kukanya vua ya magho, na luhehia.

¹⁴ Ukakumba mawanu ghake na kuwisaghisa wamaiza wake, ukafunya luhehia na kuwiwinga noko.

¹⁵ Baharinyi kondonyi korewonekieghe, na misingi ya wurumwengu ikafunukulwa iji korewidokieghe wamaiza wako ee BWANA, kukiwirurumia kwa machu ghako.

¹⁶ BWANA oreserieghe kufuma koighu; ukaniwada; ukanifunya andenyi ya machi ghimilie.

¹⁷ Ukanikira na m'maiza wapo uwadie ndighi, na awo wandu wose werezamilwagha ni ini, werenichumbieghe ndighi.

¹⁸ Werekundeghe kunibonya kiwiwi ngelo niko na wasi, ela BWANA ukanilindia.

¹⁹ Orenifunyireghe na kuniwika andu kwa banana; ukanikira kwa kukaia oreboiloghe ni ini.

²⁰ BWANA wanilipie mecha kunughana na hachi yapo, ukanilipa kwa kukaia nisewadie ikosa jingi.

²¹ Nailindirie sharia ya BWANA, hata sikosere kwa kumsigha Mlungu wapo anduangi.

²² Nariwadie Sharia rake rose, na memu yake siisighie anduangi.

²³ Serekoghe na ikosa jingi imbiri kwake, nerekulindirieghe ini moni na kiwiwi.

²⁴ Kwa huwo BWANA wanilipie kunughana na hachi yapo, na seji nisekosere imbiri kwake anduangi.

²⁵ BWANA, kwadakuwonyera kumoni seji kuko mloli kwa uo uko mloli, na kwa mundu mucha, kwadakuwonyera kumoni kukaia mucha.

²⁶ Kwa uo uelie, kwadakuwonyera kumoni kukaia mweli, na kwa uo mmbiwi, kwadakuwonyera kumoni kukaia m'maiza.

²⁷ Oho kwadawikira wandu wikuserie, na kuwisera awo wikujosere.

²⁸ Ee BWANA, oho kwanilangalishira mwengere; na kuchiwinga kira chapo.

²⁹ Nadima kujikaba ijeshi kwa kudima kwako, na kurama luvuna lwa m'maiza kwa ndighi rako.

³⁰ Uhu Mlungu, chia yake ni ya loli putu, malaghiro ghake gheko na wuloli; uo wadawilindia wose wikusaghikagha kwake.

³¹ Nani uko Mlungu useeka ni BWANA? Na nani uko mlindiri useeka ni Mlungu odu?

³² Mlungu nuo unifungishagha ndighi, na kunilindia chienyi.

³³ Oreghibonyereghe maghu ghapo ghikaie ghimange sa gha sarigha, na kuniwika banana aighu mghondinyi.

³⁴ Wanifundisha kulwa wuda, na mikonu yapo ikadima kuruda ndana ya shaba.

³⁵ Ee BWANA, kwadanilindia na kunikira, kwadanimazira kwa ndighi rako, na kukusera kwako kwaniwunjire m'baa.

³⁶ Oho kwaishabue chia mbaa eidiria, eri nisewinike.

³⁷ Nawiwingie wamaiza wapo ngawiwada; serewurieghe nyuma hata wikatoteshwa.

³⁸ Nerewikabieghe wikaghwa imbiri kwapo, hata ndeweredimieghe kuwuka sena anduangi.

³⁹ Koreninekieghe ndighi relwa wuda, kukawibonya wamaiza wapo wighoghome maghunyi kwapo.

⁴⁰ Korewibonyereghe wamaiza wapo wikimbie imbiri kwapo; ngawitotesha awo werekoghe wikizamilwa ni ini.

⁴¹ Werekemieghe wikilola wutesia, ela ndekorekoghe na mndungi okira anduangi; wikamlilia BWANA, ela nderewitumbulieghe anduangi.

⁴² Ngawifasha-fasha wikawuya sa teri idukwaghwa ni mbeo; ngawikumba noko sa mazozo gha chienyi.

⁴³ Kwanikirie nisesimane na wandu, kukaniwika nikaie m'baa wa mbari ra wandu; wandu niserewiichighi wikanidumikia.

⁴⁴ Wiendasikira malagho ghapo woruwu, wikakusera winisikireghe; waghenyi wikacha wikinighoghomia.

⁴⁵ Waghenyi werefueghe ngolo, wikafuma ngomenyi kwawo wikisughusika.

⁴⁶ BWANA oko moyo; mlindiri wapo ndekaso. Uo Mlungu Mkiri wapo ndekumo.

⁴⁷ Wadanineka wusimi aighu ya wamaiza wapo, na kuwiwika wandu wa mbari zima aisi yapo;

⁴⁸ ukanikira na wamaiza wapo. Ee BWANA, kwaninekie wusimi aighu ya wamaiza wapo, kukanilindia na wandu wing'etere.

⁴⁹ Kwa wundu ughu nichakukuma aghadi ya mbari zima ee BWANA, na kujiboria irina jako makaso.

⁵⁰ Mlungu wamneka mzuri wake wusimi m'baa, na kuwonyera lukundo lukatie kwa Msaghulwa wake; uo Daudi na kivalwa chake kwa kala na kala.