ZABURI 149 - Biblia Ilagho Jiboie Kwa Wandu Wose

Lumbo lokasa

¹ BWANA ndekaso! M'borienyi BWANA lumbo luwishi; mkasenyi andenyi ya ikwanyiko ja wandu wake wa loli.

² Israeli ndeboilo ni Muumbi wake; wandu wa Sioni ndewimzumie Mzuri wawo.

³ Ndewijikase irina jake wikivina, wikim'boria chumbo risingie kwa mayanga na vinubi.

⁴ BWANA wadaboilwa ni wandu wake; wadawibonya wandu wikuserie wineko ishima kwa kuwibonya wisime.

⁵ Wandu wa Mlungu ndewiboilo kwa wusimi ghwawo; ndewibore kwa kuboilwa mawulinyi kwawo.

⁶ Ndewimkase Mlungu kwa chwaka ra ighu, wiko na chufu rikalie mikonunyi kwawo

⁷ wisime iro mbari zima, na kuwineka wandu ikabo,

⁸ wiwifunge wazuri wawo na minyororo na wandu wawo wa ishima; wiwifunge na pingu ra chuma,

⁹ na kuwitanya seji koni Mlungu ughambie. Ughu nigho wusimi ghwa wandu wa Mlungu. BWANA ndekaso!