ZABURI 148 - Biblia Ilagho Jiboie Kwa Wandu Wose

Kuwanga wurumwengu ghose ghumkase Mlungu

¹ BWANA ndekaso! Mkasenyi BWANA kufuma mlungunyi, mkasenyi inyo muko aighu aho.

² Malaika wose ndewimkase; ijeshi jake jose ndejimkase.

³ Mkasenyi inyo iruwa na mori; mkasenyi inyo mmbose nyerinyeri mng'alaa-ng'ala.

⁴ Mkasenyi inyo mlungunyi koighu, na inyo machi muko mawingunyi naighu.

⁵ Ndevijikase irina ja BWANA, angu orelaghirieghe, vikaumbwa.

⁶ Oreviwikieghe andu kuari vikaie kwa kala na kala; ukafunya momu ghusechaaghaluswa jingi.

⁷ Mkasenyi BWANA kufuma ndoenyi, inyo nyamandu ra baharinyi na andu kumilie kose.

⁸ Luhehia na vua ya magho, theluji na ikungughu, na mbeo ya kiremba ikatishagha malaghiro ghake.

⁹ Mkasenyi inyo mighondi mibaa na mitini yose, midi ya matunda na misida yose,

¹⁰ nyamandu na mfugho rose, shimandu na nyonyi riburukagha!

¹¹ Mkasenyi inyo wazuri wa ndoenyi na wandu wose, wabaa na wabonyi nguma wose wa ndoenyi,

¹² wadawana na wai, waghosi chiaimweri na wanake.

¹³ Ndewijikase irina ja BWANA! Irina jake ni ibaa kuchumba ghose; wubaa ghwake ghwachumba ndoenyi na mlungunyi.

¹⁴ Waibonyere mbari yake kukaia na ndighi eri wandu wake wose wimkase, awo wandu wa Israeli uwikunde nandighi. BWANA ndekaso!