ZABURI 143 - Biblia Ilagho Jiboie Kwa Wandu Wose

Ilombi jelomba wutesia

¹ Sikira ilombi japo ee BWANA; sikira kuvoya kwapo kwa hachi yako; Nitumbulie kwa wuloli ghwako.

² Kusakenighenja kutanyonyi ini mdumiki wako; ndekuwadie mndungi uko mhachi imbiri kwako.

³ M'maiza wapo waninughie; waniwadie ukanisima. Waningirie kifungonyi cha kira; nani neeka sa wandu wifue kokala.

⁴ Kwa huwo nafwa ngolo, na kukambwa ni chongo.

⁵ Nakumbuka matuku ghiidie; naghiririkanya ghose kubonyere naghikumbuka mabonyo ghako ghose.

⁶ Nakughoruya mikonu yapo ngilomba; roho yapo yakaia na kau na oho sa ndoe iomie.

⁷ Shashira kunitumbulie ee BWANA; nasowekelwa ni isuwirio. Kusakekuvisa nisekuwone, nisechekaia sa wandu wiserwagha kaburinyi.

⁸ Kunikumbuse lukundo lwako lukatie kula nakesho, angu nakurumiria oho. Nakulomba kunifundishe chia inifwanagha niinughe.

⁹ Nakukimbiria oho BWANA, kunikire na wamaiza wapo.

¹⁰ Oho ko Mlungu wapo; nifundishe kubonya lukundo lwako; kaia mucha kwapo, kunilongoze kwa chia ndicha. Roho wako mucha ndenighenje kwa chia ya kara kara.

¹¹ Kunilindie kwa wundu ghwa irina jako ee BWANA. Kunifunye wasinyi kwa hachi yako.

¹² Kuwibwaghe wamaiza wapo, kwa wundu ghwa lukundo lwako lukatie; kuwitoteshe wakorongi wapo, angu ne mdumiki wako.