ZABURI 141 - Biblia Ilagho Jiboie Kwa Wandu Wose

Kulomba kwa nakenyi

¹ Nakuwanga BWANA, shashira kunitesie! Iji nawanga, kunisikire.

² Wusa malombi ghapo sa marumba mecha, na kuwusira mikonu yapo kukaie sa kizongona cha nakenyi.

³ Wika mlindiri momunyi kwapo ee BWANA; kusenisighe ngideda kiwiwi.

⁴ Kusakenisigha niboilo ni kubonya makosa, na kukuranganya na wawiwi andenyi ya mabonyo ghawo ghizamie; Jingi kusenisighe ningie andenyi ya karamu rawo.

⁵ Mundu mucha wadima kunikaba na kunidokia kwa wughoma, ela sichaarumiria ishima kufuma kwa mmbiwi, angu nadatangala mawiwi ghawo malombinyi kwapo.

⁶ Iji wabaa wawo wapotolwa maghambenyi, wandu wicharumiria kukaia malagho ghapo ni gha loli.

⁷ Seji mundu ubaragha mbande na kuridumbua vipande vipande, niko koni maindi ghawo ghichaasasarwa akaburinyi.

⁸ Ela ini naawuyakurumiria oho BWANA Mlungu wapo. Nialola wulindiri ghwako; kusakenisigha nibwagho.

⁹ Kunilindie na mdegho wighudeghie kwa wundu ghwapo, na iro shaghala ra wabonyi mawiwi.

¹⁰ Wawiwi ndewichunuke andenyi ya midegho yawo cheni, na ini niide banana.