ZABURI 140 - Biblia Ilagho Jiboie Kwa Wandu Wose

Ilombi jelomba wulindiri

¹ Kunikire na wandu wawiwi ee BWANA; kunilindie na wandu wing'etere.

² Wadabonya mipango ya wuwiwi toe, na kubonya sheshe rereda marashano.

³ Wadabonya chumi rawo rikaie rikalie sa ra choka, na madedo ghawo ni sa wusungu ghwa ngunuku.

⁴ Kunilindie na ndighi ra wandu wawiwi ee BWANA; kuniwike kula na wandu wing'etere, wibonyagha njama enighusha.

⁵ Wandu wikukasire wavisire mdegho kwa wundu ghwapo; wafungie nyavu wikaiala, na kuniwikia shaghala achienyi.

⁶ Nadamzera BWANA, “Oho ko Mlungu wapo.” Sikiria lwaka lwa kuvoya kwapo ee BWANA.

⁷ Ee BWANA Mlungu wapo, mlindiri wapo uwadie ndighi, kwanilindirie wudenyi.

⁸ Kusakemkatishira mmbiwi bea rake ee BWANA; kusaketesia njama yake mbiwi.

⁹ Awo winimaragha chia rose wakuwusira weni aighu yapo; madedo ghawo gha kisha aighu yapo ndeghiwipate weni.

¹⁰ Ndewipotokelo ni maka gha modo. Ndewikumbo vinenyi wisewuyaafuma sena.

¹¹ Mzighirii usewone nicha isangenyi; mng'eti ndepato ni wuwiwi shwa.

¹² Naichi BWANA kwawidederiagha wandu wikorongwagha, na kuwitanyira hachi awo wisowagha.

¹³ Wahachi wichakukasa loli loli; wandu wecha wichakaia andu kuko.