ZABURI 139 - Biblia Ilagho Jiboie Kwa Wandu Wose

Kumanya kwa Mlungu kukatie, na wulindiri ghwake

¹ Ee BWANA, kwanizighanire kukanimanya.

² Oho kwaichi maza rose nibonyagha; kwaghimanya maghesho ghapo ghose.

³ Oho kwaichi seji nighendagha na seji nihoreshagha; kwaichi mabonyo ghapo ghose.

⁴ Hata imbiri nisededie ee BWANA, oho kwameria kumanya seji nichaadeda.

⁵ Oho kwanimara chia rose; kwawuyanilindia kwa ndighi rako.

⁶ Kumanya uko kwaawuyanishinua nandighi, kooka ighu hata sidimagha kukuvikia.

⁷ Nighenda hao nikaie kula na oho? Angu niendakaia hao kuseniwonagha?

⁸ Ngajoka mlungunyi, oho koko aeni! Ngalala Andu kwa Wafu, oho koko aeni!

⁹ Ngera nadaburuka kula cha mashariki, niendekaia kula cha magharibi,

¹⁰ hata aho wori kuchakaia kunilongoze, na mkonu ghwako ghwa kiwomi ghuchanimaziria.

¹¹ Ngaghamba nifinikiro ni kira, na mwengere ghunimare chia rose ghuwuye kio,

¹² kira ndechiko kwako; kio cheela sa dime, kwako kira na mwengere veefwanana.

¹³ Oho koreumbieghe via vapo vose; kukaniwadanisha chiaimweri kifunyi kwa mao.

¹⁴ Nakukasa, angu kwaniumbie kwa chia eobosha na mashiniko; Ilagho iji najimanya ngolonyi kwapo to.

¹⁵ Iji maindi ghapo ghereumbwagha, na kuwadanishwa chiaimweri kwa wuya kifunyi kwa mao; iji nerezoghuagha aho kivisonyi, koremanyireghe angu neko aho;

¹⁶ koreniwonieghe imbiri nisevalo. Matuku ghapo ghose ninekelo, ghereandikiloghe andenyi ya chuo chako, imbiri jingi jaro jisezoe.

¹⁷ Maghesho ghako ghakurie saki kughitambua ee Mlungu! Gheeka mengi na ndighi!

¹⁸ Wei nadaghitala, ghadakaia mengi kuchumba msangagha hata ngeduasia, sena kokwanye nani.

¹⁹ Ndakwawibwaghaa wawiwi ee Mlungu, awo wabwaghi wikaniinjikia noko.

²⁰ Awo wadadeda kisha aighu yako, wadadeda kiwiwi aighu ya irina jako.

²¹ Nadazamilwa ni wandu wizamilwagha ni oho BWANA, na kuwimenya awo wilwagha na kumoni.

²² Wadanizamia tiki; nadawitala kukaia wamaiza wapo.

²³ Kunizighane ee Mlungu kuimanye ngolo yapo! Kunitime kumanye maghesho ghapo.

²⁴ Kuwone ngera ghoko wuwiwi ghungi andenyi kwapo, kunighenje na chia icheni ya kala.