ZABURI 132 - Biblia Ilagho Jiboie Kwa Wandu Wose

Kuikuma Hekalu

¹ Ee BWANA, kumkumbuke Daudi, na maza rose rikurie orerirumaghieghe.

² Kumbuka BWANA seji orelaghirieghe na kughema; kwako oho Kuwadie Ndighi, Mlungu wa Jakobo ukighamba,

³ “Sichaangia nyumbenyi, hata kujoka wulinyi;

⁴ sichaahora hata sichaalala,

⁵ hata nimerie kupata wulalo kwa wundu ghwa BWANA, andu kokaia kwa wundu ghwa Mlungu Uwadie Ndighi wa Jakobo.”

⁶ Dasikire malagho gha Sanduku ya Ilaghano diko Bethlehemu, dikaaiwonia mlambenyi ghwa Jearimu.

⁷ Niko dikaghamba, “Ndedighende nyumbenyi kwa BWANA; ndeditase imbiri ya kifumbi chake cha nguma.”

⁸ Wuka ee BWANA, kungie Hekalunyi kwako chiaimweri na Sanduku ya Ilaghano alama ya ndighi rako.

⁹ Wakohani wako ndewibonye gha hachi, na waeli wako wibore kwa kuboilwa.

¹⁰ Kwa wundu ghwa mdumiki wako Daudi, kusakemlegha mzuri uo kumsaghue.

¹¹ BWANA, korem'bonyereghe Daudi ilaghiro ja loli, kusedimagha kujiinja: “Nichammbika umu wa kivalwa chako aighu ya kifumbi chako cha nguma.

¹² Wana wako wikajiwadia ilaghano japo na memu yapo nichaawifundisha, wana wawo wori wichakaia aighu ya kifumbi chako cha nguma wulalo ghwako kwa kala na kala.”

¹³ BWANA wasaghue Sioni; ukunde ukaieghe aho ukighamba,

¹⁴ “Aha niko nichaadua kwa kala; nichakaia aha, angu niko nikukunde.

¹⁵ Nicharasimia vindo varo kwa wungi, nichawighudisha wakiwa waro vindo.

¹⁶ Nichawirusha wakohani waro kukia, na waeli waro wichabora kwa kuboilwa.

¹⁷ Nicham'bonya umu wa kivalwa cha Daudi ukaie mzuri m'baa; mzuri nimsaghuagha nicham'bonya uduo ukibonya nguma.

¹⁸ Nichawifusha waya wamaiza wake, ela wuzuri ghwake ghuchachurikia na kuwona nicha.”