ZABURI 114 - Biblia Ilagho Jiboie Kwa Wandu Wose

Lumbo lwa Pasaka

¹ Iji wandu wa Israeli werefumieghe Misri, iji kivalwa cha Jakobo cherefumieghe isanga ja kighenyi,

² wandu wa Juda werewurieghe waeli wa BWANA, na wandu wa Israeli wikawuya ifwa jake.

³ Bahari ya Shamu erezighanireghe ikakimbia; Moda ghwa Jordani ghukasigha kuida.

⁴ Mighondi mibaa ikarama-rama sa mburi, na mighondi mitini sa wana wa ng'ondi.

⁵ Kwawonaki ee Bahari kukimbiagha? Kwawonaki Jordani kuseidagha?

⁶ Kwaki mramaa-rama sa mburi ee mighondi mibaa? Kwaki mramaa-rama sa wana wa ng'ondi ee mighondi mitini?

⁷ Sughusika imbiri ya BWANA ee ndoenyi, sughusika imbiri ya Mlungu wa Jakobo,

⁸ uo ughalusagha igho jiwuye kiriwa cha machi, na igho jikurie jiwuye ndoria ya machi.