Biblia Todo Logo
Bìoball air-loidhne

- Sanasan -

ZABURI 103 - Biblia Ilagho Jiboie Kwa Wandu Wose


Lukundo lwa Mlungu

1 Mkase BWANA ee roho yapo, na irangi japo jose ndejikase irina jake ja wueli.

2 Mkase BWANA ee roho yapo, hata kusakeliwa wucha ghwake ghose ukubonyere.

3 Uo wadanifuya wughoma kaung'a rapo rose, na kuniboisa makongo ghapo ghose.

4 Uo wadanilindia nisengie kaburinyi, na kunirasimia kwa lukundo na wughoma.

5 Wadanighudisha na vindo vicha, eri nikaie mkoo niko na ndighi sa indu.

6 BWANA uchawidederia na kuwipatira hachi wandu wose wikorongwagha.

7 Oremmanyishireghe Musa mipango yake; ukawiwonyera wandu wa Israeli mabonyo ghake.

8 BWANA ni wa wughoma na wa mvono; ndejokwagha ni machu shwa-shwa, nao wachua lukundo lukatie.

9 Ndedokiagha wandu ngelo rose; ndewikiagha mndungi machu.

10 Ndedikabagha kunughana na kaung'a redu, hata ndedilipiagha kunughana na mawiwi ghedu.

11 Sa iji mawingunyi kuko ighu kufuma ndoenyi, huwo koni lukundo lwake ni lubaa kwa awo wimuobuagha.

12 Wadadiinjira kaung'a redu rikaie kula nesi, sa mashariki na magharibi.

13 Sa iji koni ndee wana uwiwoniagha wana wake wughoma, niko koni BWANA uwiwoniagha wughoma awo wimuobuagha.

14 Waichi tabia redu; wakumbuka kukaia isi de teri.

15 Irangi ja mdamu jeeka sa nyasi, wazoghua na kuwoneka sa mboi ya mlambenyi;

16 ikawetwa ni mbeo yadasoweka, isewuyaamanyika andu ikoghe.

17 Ela lukundo lwa BWANA lwadua kufuma kala hata kwa kala, kwa awo wimuobuagha, na wucha ghwake ghwadua kwa vivalwa vawo vose,

18 awo wijiwadiagha ilaghano jake, na kuikatisha memu yake.

19 BWANA wachiwikie kifumbi chake cha nguma mlungunyi, nao wadawibonyera nguma wandu wose.

20 Mkasenyi BWANA inyo weke malaika wake mmbwadie ndighi, msikiragha malagho ghake, na kuwada agho ughoragha.

21 Mkasenyi BWANA inyo majeshi ghake ghose, wadumiki wake m'bonyagha lukundo lwake.

22 Mkasenyi BWANA inyo maumbo ghake ghose, andu kose ubonyagha nguma. Mkase BWANA ee roho yapo.

©Bible Society of Kenya, 1997

All rights reserved.

Bible Society of Kenya
Lean sinn:



Sanasan