ZABURI 102 - Biblia Ilagho Jiboie Kwa Wandu Wose

Ilombi ja mundu wa irika uko na wasi

¹ Sikiria ilombi japo ee BWANA, naawuyakema kunitesie.

² Kusakekuvisa ngelo niko na wasi, Kunideghie kudu kwako, iji nawanga kusemuke kunitumbulia.

³ Matuku ghapo ghaawuyaida sa mosi, mumbi ghwapo ghwahia sa maka gha modo.

⁴ Nakabilo ngawuya sa nyasi riomie; ngasowa bea ya vindo.

⁵ Naawuyaruma na ndighi; neesighwa maindi maduu.

⁶ Neeka sa nyonyi ya kireti; sa mavui wa maghachonyi.

⁷ Nadalala nilave; neeka sa nyonyi iko iekeri aighu nyumbenyi mwambori.

⁸ Wamaiza wapo wadasinda wikinidukana; awo wisindagha wikiniseka wadaewia wikitumia irina japo.

⁹ Nadaja ivu sa vindo, na kuranganya kunywa kwapo na mbori.

¹⁰ Kwa kukaia kwanibonyere machu mabaa, kukaniwada na kunikumba noko.

¹¹ Matuku ghapo gheeka sa kiju cha luma lwa kenyi, neeka sa nyasi riomie.

¹² Ela oho ee BWANA, ko mzuri wa kala na kala; kuchakumbukwa vivalwa vose.

¹³ Kuchawuka na kuwonia Sioni wughoma; ngelo yake efuilwa wughoma yameria kuvika ngelo yaro ni icheni ihi.

¹⁴ Wadumiki wako waikunde Sioni, hata ngera yanonelo; waiwonia wughoma; hata ngera yawurie kitungasi.

¹⁵ Mbari zima richamuobua BWANA; Wazuri wose wa ndoenyi wichaobua wudimi ghwake.

¹⁶ Kwa kukaia BWANA uchaiagha Sioni, nao uchawonyera wubaa ghwake.

¹⁷ Uchawisikiria wandu wake wisighilo, na kusikira malombi ghawo.

¹⁸ Malagho agha ndeghiandiko kuwikilwa kivalwa chichagha, eri wandu wisevalo wichemkasa BWANA:

¹⁹ BWANA wazighanire ndoenyi kufuma koighu andu kwake kwa wueli; ukaizighana ndoe kufuma mlungunyi,

²⁰ upate kusikira kuruma kwa wafungwa, na kuwifungua awo weretanyiroghe kufwa.

²¹ Kwa huwo irina jake jichaereshwa Sioni, nao uchakaswa Jerusalemu,

²² ingelo wandu wa mbari zima na mawuzuri ghikwanagha chiaimweri kumtasa BWANA.

²³ BWANA wanisirisha ndighi niko mwana; waghipunguzire matuku ghapo.

²⁴ Nani ngaghamba, “Ee Mlungu wapo, kusakenisigha nifo niko mkoo. Ee BWANA, oho kwadua kwa kala na kala.”

²⁵ Oho korewikieghe misingi ya wurumwengu kon kala, na mlungunyi ni kazi ya mikonu yako.

²⁶ Iro richatota, ela oho kuchadua; rose richaghosia sa nguwo. Oho kwadarighalusa sa nguwo, naro rasia.

²⁷ Ela oho kwadua wokoni, na miaka yako ndeisiagha.

²⁸ Wana wedu wichadua banana, na kivalwa chawo chichadua banana aisi ya wulindiri ghwako.