ZABURI 10 - Biblia Ilagho Jiboie Kwa Wandu Wose

Kulomba hachi ikaie

¹ Kwaki kwakaia kula ee BWANA? Kwaki kukuvisagha ingelo ya wasi?

² Wawiwi wawiwinga wakiwa na ndighi kwa lukaso lwawo; kuwibonye wiwado ni midegho yawo icheni wiideghie.

³ Mundu mmbiwi wadakukasa na bea ra ngolo yake, mundu wa choyo, wadamuewia na kumlegha BWANA.

⁴ Mundu mmbiwi ukukasire ndemtalagha BWANA; wadaghesha ngelo rose Mlungu ungi ndeuko.

⁵ Maza rake radakaia nicha ngelo rose; wakukasire hata ndetambukilwagha ni kutanya kwa Mlungu. Wadawiseka wamaiza wake wose kwa lumenyo.

⁶ Wadaghora ngolonyi kwake, “Sinyavurikagha; sichaakaia na wasi ghungi vivalwa vose.”

⁷ Oochulwa ni kuewia, na mikalo, na kukoronga. Wadeda malagho ghenona na gha wuwiwi.

⁸ Wadawilaliria wandu a mizinyi, na kuwibwagha wandu wisene ikosa a kivisonyi. Wapeleleza wakiwa akivisonyi,

⁹ na kulaliria sa shimba ikuvisire, upate kummbwada iji wangia mdeghonyi ghwake.

¹⁰ Wawighusha wakiwa na kuwifasha kwa ndighi rake.

¹¹ Uo mundu mmbiwi waghamba ngolonyi kwake, “Mlungu waliwa; wafinikira wushu ghwake hata ndeniwonagha.”

¹² Wuka ee BWANA, kuwonyere ndighi rako ee Mlungu, kusakewiliwa awo wikorongwagha.

¹³ Kwaki mundu mmbiwi ummenyagha Mlungu, nao ughambe ngolonyi kwake, “Ndenibonyagha ilagho jingi?”

¹⁴ Ela oho kwawuyawona ee Mlungu, kwawuyazighana wasi na kusumbuka kwawo; koko tayari kutesia. Mkiwa wadakuwika kwako, na oho kwadawitesia wana wakiwa.

¹⁵ Msirishe ndighi mmbiwi na mng'eti; mkabe hata usighe wuwiwi ghwake putu.

¹⁶ BWANA ni mzuri kwa kala na kala, watasi milimu wichatota isangenyi kwake.

¹⁷ Kuchasikira malombi gha wandu wikuserie ee BWANA; kuchawikumba ngolo, na kuwideghia kudu kwako,

¹⁸ kupate kubonya ijo ja loli kwa wana wakiwa, na awo wikorongwagha; eri mdamu ubonyero kwa ndoe, useduo ukiobosha wandu.