WUKUMBUSO 9 - Biblia Ilagho Jiboie Kwa Wandu Wose

Kuleghasikira kwa wandu

¹ “Sikirenyi inyo wandu wa Israeli, mcharuwuka Jordani idime, mngie na kuwusa mizi ya iro mbari riko mbaa, sena riwadie ndighi kumchumba. Mizi yawo ni mibaa, iko na mawurigha ghivikagha hata mawingunyi.

² Wandu waro ni Waanaki aweni muwiichi; ni wandu wabaa, na inyo mwasikire kukaia ndekuwadie mndungi udimagha kulwa nawo.

³ Ela idana mchawona mmbeni kukaia BWANA Mlungu onyu uchaghenda imbiri konyu sa modo ghulunguragha; uchawikaba na kuwitotesha imbiri konyu, nenyo mchawiwinga noko na kuwitotesha shwa-shwa sa iji koni BWANA Mlungu umlaghirie.

⁴ “BWANA Mlungu onyu ukameria kuwifunya noko awo wandu imbiri konyu, mseghore ngolonyi konyu wei BWANA oomreda kujiwuse ijo isanga angu wei mfwane, ela ni kwa wundu ghwa wuwiwi ghwa iro mbari, niko BWANA uwiwingagha imbiri konyu.

⁵ Si kwa wundu ghwa hachi enyu, angu wucha ghwa ngolo renyu mwawuyaghenda kujiwusa isanga jawo anduangi, ela ni kwa wundu ghwa wuwiwi ghwa mbari iri, niko BWANA Mlungu onyu wawuyariwinga noko imbiri konyu upate kukatisha ilagho ijo orewighemieghe weke ndeyo Abrahamu, Isaaka na Jakobo.

⁶ Na huwo mmanye kukaia BWANA Mlungu onyu ndewuemneka ijo isanga icha angu wei mfwane; inyo mo mbari ighilikie.

⁷ “Jingi mseliwe seji morem'bonyereghe BWANA Mlungu onyu ukakaia na machu kireti. Kufuma ituku mfumie isanga ja Misri hata kuvika aha, modeeka mkilegha kumsikira BWANA.

⁸ Hata aja Sinai, moremvavirieghe BWANA ukajokwa ni machu, nao ukazamilwa nandighi hata ukakunda kumtotesha.

⁹ Nani iji nerejokieghe mghondinyi kuwusa vishawalata va magho, ivo va ilaghano BWANA orejibonyereghe nenyo, nerekaieghe aighu ya mghondi matuku mirongo ina kio na dime; serejieghe vindo, hata kunywa machi ghangi.

¹⁰ BWANA ukanineka ivo vishawalata va magho viwi viandikilo na chala cha Mlungu; na aighu yaro koreandikiloghe malagho ghose agho BWANA oreghorieghe nenyo aighu ya mghondi aghadi ya modo, ijo ituku ja ikwanyiko.

¹¹ Nao kutua kwa agho matuku mirongo ina kio na dime, BWANA ukanineka ivo vishawalata va magho va ilaghano.

¹² “Niko BWANA ukanizera, ‘Wuka kusee mghondinyi shwa-shwa, angu wandu wako awo kuwiredie kufuma Misri wakunona weni kwa kughaluka shwa-shwa na kuisigha iyo chia nerewilaghirieghe; nawo wakubonyera weni mlimu ghuchanilo.’

¹³ “BWANA ukachuria kunizera, ‘Nawonie awandu ni wandu wighilikie.

¹⁴ Leka niwitoteshe nijiinje irina jawo ndoenyi; na oho nichakubonya kukaie mbari mbaa iko nandighi kuwichumba.’

¹⁵ “Niko ngaghaluka ngasea mghondinyi, nagho ghorekoghe ghukiaka modo; ivo vishawalata va magho va ilaghano nerekoghe naviwadia mikonunyi.

¹⁶ Nao iji nazighana, ngawona kukaia mwameria kum'bonyera BWANA Mlungu onyu kaung'a kwa kukuchania mmbeni mlimu ghwa ngache na kusigha shwa iyo chia BWANA orekoghe wamlaghira.

¹⁷ Kwa wundu ugho ngavipotua vija vishawalata va magho viwi, vikabarika imbiri konyu.

¹⁸ Niko ngaghwa kijimijimi sena imbiri ya BWANA sa imbiri matuku mirongo ina kio na dime. Serejieghe vindo hata kunywa machi kwa wundu ghwa iyo kaung'a yose ebonya ugho wuwiwi imbiri ya BWANA, hata mkamshekeria ujoko ni machu.

¹⁹ Nerekoghe ngiobua machu na kubia kubaa BWANA orekoghe nako aighu yenyu, hata ukakunda kumtotesha. Ela hata ngelo iyo wori, BWANA ukanisikira.

²⁰ BWANA orekoghe wazamilwa ni Haruni loli loli, ukakundamtotesha; na wokoni iyo ngelo cheni, ngamlombia Haruni.

²¹ Niko ngawada chija kilambo cha kaung'a, iyo ngache moreibonyereghe, ngaikora na kuifasha ngaisha hata ikawuya idendere sa teri; ngaida andenyi ya kamoda kerekoghe kikisea kufuma mghondinyi.

²² “Wokoni moremshekerieghe BWANA ukajokwa ni machu aja Tabera, na Masa na Kibrothi-hataava.

²³ Hata iji BWANA oremdumieghe kufuma Kadesh-barnea ukimzera mjoke mjiwuse ijo isanga umnekie moreleghieghe malaghiro gha BWANA Mlungu onyu, mkalegha kumrumiria hata kumsikira lwaka lwake.

²⁴ Kufuma nazoya kummanya, inyo mwadamlegha BWANA toe.

²⁵ “Kwa wundu ugho ngaghwa kijimijimi imbiri ya BWANA matuku mirongo ina kio na dime, angu BWANA Mlungu orekundeghe kumtotesha.

²⁶ Ngamlomba BWANA, ‘Ee Bwana MLUNGU, kusakewitotesha wandu wako, ifwa jako; awo korewikombueghe kwa ndighi rako mbaa na kudima, kukawifunya Misri.

²⁷ Kumbuka mdumiki wako Abrahamu, na Isaaka na Jakobo; kusaketala kughilika kwa awa wandu, hata mawiwi ghawo, na kaung'a yawo.

²⁸ Wamisri wicheghamba wei BWANA oolemwa ni kuwighenja ijo isanga orewilaghirieghe, na angu wei weemzamia ukawighenja uendewibwagha kireti.

²⁹ Angu awo ni ifwa jako; awo korewifunyireghe kwa ndighi rako mbaa na kwa wusimi ghwako m'baa.’