WUKUMBUSO 7 - Biblia Ilagho Jiboie Kwa Wandu Wose

Wandu wa BWANA moni

¹ “Iji BWANA Mlungu wako wamreda isangenyi ijo mngiagha kujiwada, na kuinja mbari nyingi imbiri konyu, Wahiti, Wagirgashi, Waamori, Wakanaani, Waperizi, Wahivi, na Wajebusi, mbari mfungade mbaa riko na ndighi kumchumba,

² na iji BWANA Mlungu wam'bonya murisime, suti muritoteshe putu; msebonye ilaghano jingi nawo, hata msewiwonie wughoma ghungi.

³ Mseloworane nawo, mkifunya wai wenyu kwa wundu ghwa wadawana wawo; angu kuwusa wai wawo kwa wundu ghwa wadawana wenyu.

⁴ Angu wichawighalua wadawana wenyu wiseninughe, wipate kuitasa milungu mizima; na BWANA uchajokwa ni machu aighu yenyu na kumtotesha shwa-shwa.

⁵ Ela mchawibonyera huwu: mchavuchua madhabahu rawo, na kurichikanya nguro raro, na kudema fwana ra mlungu ghwawo ghwa waka Ashera, na kurikora fwana rawo riwachilo.

⁶ Angu inyo mo wandu msaghulo ni BWANA Mlungu onyu kufuma aghadi ya wandu wose wa ndoenyi; mkaie wake moni; nenyo mo wasaghulwa wa BWANA Mlungu onyu.

⁷ Si angu wei mooka wengi kuchumba wandu wazima ima BWANA ukamkunda na kumsaghua; kwa kukaia inyo moko watini kuchumba wandu wose.

⁸ Ela ni angu BWANA umkunde, nao waawuyajimazira ighemi jake ijo orewighemieghe weke ndeyo, ukamfunya kwa kudima kwake kubaa, na kumkombua kufuma nyumba ya wuzumba, na kufuma kwa ndighi ra mzuri wa Misri.

⁹ Kwa huwo manyenyi kukaia BWANA Mlungu onyu, ni Mlungu; nao ni mloli umaziriagha ilaghano na kukaia na lukundo lukatie kwa awo wimkundagha na kuiwadia memu yake hata vivalwa elfu;

¹⁰ nao ndemkagha kuwikaba na kuwinona awo wizamilwaghwa ni uo.

¹¹ Kwa huwo mlindie kubonya na kukatisha iyo memu, na iro sharia na agho malaghiro nimlaghiragha idime.

Marasimio

¹² “Mkaghisikira agho mafundisho na kughikatisha, BWANA Mlungu onyu uchajimazira ilaghano jake, na kukaia na lukundo lukatie konyu; sa iji orewighemieghe weke ndeyo.

¹³ Uchamkunda na kumrasimia na kum'bonya mchurikie na kuva wana wengi; ucharasimia mbuwa renyu mpate viro, divei na mavuda; uchamrasimia mkaie na ng'ombe na ng'ondi nyingi. Uchamrasimia isangenyi seji orewilaghirieghe weke ndeyo kukaia uchawineka.

¹⁴ Mcharasimilwa kuchumba wandu wose; ndemchaakaia na kolowi ungi wa womi angu wa waka, hata aghadi ya mfugho renyu.

¹⁵ Na BWANA uchainja makongo ghose aghadi konyu. Ndekuwadie wukongo ghungi ghuzamie ghwa agho makongo gha Misri moreghimanyireghe ghichaammbwada, ela uchaghiwasira awo wandu wose wizamilwagha ni inyo.

¹⁶ Kutoteshe wandu wose BWANA Mlungu onyu uchaamsimia; msewiwonie wughoma ghungi, hata msetase milungu yawo; angu awo wichawuya mdegho konyu.

¹⁷ “Mseghambe ngolonyi konyu wei awandu weeka wengi diwifunya wada isangenyi.

¹⁸ Msewiobuo; kumbukenyi seji BWANA Mlungu onyu orem'bonyereghe mzuri wa Misri yose.

¹⁹ Kumbukenyi agho makongo gheobosha moreghiwonieghe na meso ghenyu, weke mwakilimbiti; na mashiniko; ndighi na wusimi m'baa BWANA Mlungu onyu oremfunyireghe nagho aho. Ni huwo koni uchaawibonya awo wandu muwiobuagha.

²⁰ Chiaimweri na agho, BWANA Mlungu onyu uchaduma ngalamvu aghadi kwawo, hata awo wandu wisigharikagha na kukuvisa widime watoteshwa.

²¹ Msakewiobua; BWANA Mlungu onyu oko aghadi konyu. Uo ni Mlungu m'baa oobosha.

²² BWANA Mlungu onyu uchariinja nambai iro mbari riko imbiri konyu mboa mboa. Mseriinje shwa-shwa, nyamandu ra isakenyi richechurikia, na kumchumba ndighi.

²³ Ela BWANA Mlungu onyu uchawingira wamaiza wenyu mikonunyi konyu na kuwikambira chongo hata widime watota putu.

²⁴ Uchabonya wazuri wawo muwisime, nenyo mchawibwagha na kuwimeria hata wiliwike isangenyi; mndungi ndechaadima kumtangala, hata mwameria kuwitotesha.

²⁵ Mkore milimu yawo; msekaie na bea ingi ya feza angu dhahabu rishingilo aighu yaro, hata mseiwuse mchengia mdeghonyi; kwa kukaia radamzamia BWANA Mlungu onyu.

²⁶ Mserede ghungi ghwa iyo milimu mizinyi konyu, mchewadwa ni njowe yawo; muimenye putu angu iwasirilo njowe ni Mlungu.