WUKUMBUSO 6 - Biblia Ilagho Jiboie Kwa Wandu Wose

Momu ghuko m'baa

¹ “Idana ughu nigho momu na sharia na malaghiro, agho BWANA Mlungu onyu orenilaghirieghe nimfundishe, eri mpate kughikatisha andenyi ya isanga ijo mghendagha kujiwusa.

² Na oho kumuobua BWANA Mlungu wako; oho, na mwana wako, na wawayo, kwa kuwadia iro sharia rake na memu yake nikulaghiragha kuiwadia irangi jako jose; eri matuku ghako ghikaie mengi.

³ Kwa huwo sikira ee Israeli, kulindie kughibonya, kupate kuwona nicha na kuchurikia nandighi isangenyi jinorie, sa iji koni BWANA Mlungu wa weke ndeyo ukulaghirie.

⁴ “Sikira ee Israeli: BWANA Mlungu odu ni BWANA umweri;

⁵ na oho kumkunde BWANA Mlungu wako kwa ngolo yako yose, na kwa roho yako yose na kwa ndighi rako rose.

⁶ Na agha malagho nikulaghiragha idime ghichakaia ngolonyi kwako,

⁷ kuwifundishe wana wako nicha, na kuja malagho gharo ngelo muko nyumbenyi, hata kukighenda, hata ngelo kwakaia akandonyi, na ngelo ewuka.

⁸ Kughifunge mikonunyi kwako na chamunyi kwako ghikukumbusheghe.

⁹ Kughiandike aighu ya vizingiti va minyango yako na mbembe rako.

Mafundisho aighu ya kulegha kusikira

¹⁰ “Iji BWANA Mlungu wako wakureda isangenyi ijo orewilaghirieghe weke ndeyo Abrahamu, Isaaka, na Jakobo kukaia uchakuneka, chiaimweri na mizi ighokie iyo kusereiaghieghe,

¹¹ na nyumba richuagha vilambo vose viboie ivo kuserevingirieghe, na viriwa ivo kuserevikotereghe, na mbuwa ra mizabibu na mizeituni iro kusereriwaeghe, na kuja na kughuda;

¹² kukulindie kusechemliwa BWANA uo orekuredieghe kufuma isanga ja Misri, iyo nyumba ya wuzumba.

¹³ Kumuobuo BWANA Mlungu wako, kumdumikie, na kubonya ighemi kwa irina jake.

¹⁴ Kusakeinugha milungu mizima ya awo wandu mkwanye kaavui;

¹⁵ angu BWANA Mlungu wako uko aghadi kwako, ni Mlungu uwadie iriso; usechejokwa ni machu aighu yako, na kukuinja wurumwengunyi.

¹⁶ “Kusakemtima BWANA Mlungu wako seji koremtimieghe aja Masa.

¹⁷ Kuiwadie nicha memu ya BWANA Mlungu wako, na kanuni rake na sharia rake oremlaghirieghe.

¹⁸ Na oho kubonye ijo jiko ja hachi jiboie imbiri ya BWANA, kupate kuwona nicha na kujiwusa isanga jiboie ijo BWANA orewilaghirieghe weke ndeyo kukaia uchawineka,

¹⁹ kwa chia ya kuwifunya noko wamaiza wako imbiri kwako seji BWANA orelaghirieghe.

²⁰ “Mwana wako ukakukotia ngelo richagha, ‘Welee, iri kanuni na sharia, na malaghiro BWANA Mlungu odu umlaghirie kutambua kwaro-le, niki?’

²¹ Kuchamtumbulia huwu, ‘Isi dedeeka wazumba wa mzuri aja Misri, na BWANA ukadifunya aho kwa wudimi m'baa.

²² BWANA orewonyereghe weke mwakilimbiti dikiwona, na mashiniko mabaa gheobosha aighu ya Misri, na aighu ya mzuri na nyumba yake yose;

²³ nao ukadifunya aho, upate kudireda na kudineka ijo isanga orewilaghirieghe weke aba kukaia uchawineka.

²⁴ Niko BWANA ukadilaghira dirikatishe sharia iri rose, dipate kumuobua BWANA Mlungu odu kwa wundu ghwa wucha ghodu ngelo rose, eri upate kudiwika moyo seji diko idime.

²⁵ Ni hachi kodu dikalindia na kughikatisha malaghiro agho ghose, imbiri ya BWANA Mlungu odu sa iji koni oredilaghirieghe.’