WUKUMBUSO 5 - Biblia Ilagho Jiboie Kwa Wandu Wose

Memu Ikumi

¹ Nao Musa ukawiwanga wandu wose wa Israeli ukawizera “Sikira ee Israeli iro sharia na mafundisho nimghoriagha idime, mkufundishe sena mlindie kurikatisha.

² BWANA Mlungu odu orebonyereghe ilaghano nesi aja Sinai.

³ Ilaghano iji nderejibonyereghe na weke aba wiekeri, ela odejibonya na isi diwose diko moyo aha idime.

⁴ BWANA oreghorieghe nenyo wushu kwa wushu aho mghondinyi, aghadi ya modo.

⁵ Nerekaieghe ghadi na ghadi ya BWANA na inyo ngelo iyo, nipate kumghoria malagho ghake, angu inyo moreobueghe ghuja modo, hata ndemorejokieghe mghondinyi anduangi. BWANA ukaghamba,

⁶ “BWANA ukaghamba, ‘Ini ne Mlungu wako, uo orekufunyireghe isanga ja Misri; kufuma nyumba ya wuzumba.

⁷ “‘Kusakekaia na milungu mizima imbiri kwapo.

⁸ “‘Kusakekubonyera kumoni fwana iwachilo, angu kilambo chingi chifwananagha na kilambo chiko mlungunyi koighu, hata andoenyi angu icho chiko machinyi ndoenyi nakosi;

⁹ kusakerighoghomia, hata kuritasa. Angu ini BWANA Mlungu wako ne Mlungu uwadie iriso; nadawikaba wanake kwa wundu ghwa makosa gha weke ndee, hata kivalwa cha kadadu na cha kana cha awo wizamilwaghwa ni ini;

¹⁰ ela nadawiwonyera lukundo lwapo wandu elfu elfu awo winikundagha na kuiwadia memu yapo.

¹¹ “‘Kusakejitumia irina japo kisha, angu ini BWANA sichaamtala mundu kukaia ndekosere anduangi, uo ujitumiagha irina japo kisha.

¹² “‘Kujikumbuke ituku ja Sabato kujieleshe, sa iji koni ini BWANA Mlungu wako nerekulaghirieghe.

¹³ Kudumike kwa matuku arandadu, na kubonya kazi rako rose;

¹⁴ ela ituku ja mfungade, ni Sabato kwa wundu ghwa ini BWANA Mlungu wako. Ituku ijo kusebonye kazi ingi; oho, hata mwana wako wa womi angu wa waka hata mdumiki wako wa womi angu wa waka, hata ng'ombe yako hata punda wako, hata ingi ya mfugho rako, hata mghenyi ungi uko andenyi ya mbenge rako; eri mdumiki wako wa womi angu wa waka upate kuhora sakumoni.

¹⁵ Kumbuka angu korekoghe mzumba andenyi ya isanga ja Misri, na ini BWANA Mlungu wako ngakufunya aho kwa ndighi rapo mbaa na kudima; kwa huwo niko ini BWANA Mlungu wako nawuyakulaghira kujiwadie ituku ja Sabato.

¹⁶ “‘Kuwibonyere ishima ndeyo na mayo, sa iji koni BWANA Mlungu wako orekulaghirieghe, eri matuku ghako ghikaie mengi, kuwone nicha isangenyi nawuyakuneka ini BWANA Mlungu wako.

¹⁷ “‘Kusakebwagha.

¹⁸ “‘Kusakelaka.

¹⁹ “‘Kusakeiwa.

²⁰ “‘Kusakefunya wushuhuda ghwa tee aighu ya mmbenyu.

²¹ “‘Kusakekaia na bea na muka wa mmbenyu, hata nyumba yake, hata mbuwa yake, hata mdumiki wake wa womi angu wa waka, hata ng'ombe yake, hata punda wake, angu kindo chingi chiko na mmbenyu.’

²² “BWANA oreghorieghe malagho agha kwa ikwanyiko jenyu jose aho mghondinyi, aghadi ya modo, iwingu na kira chikambie, na lwaka lubaa; hata nderechurieghe ilagho jingi. Nao ukaghiandika aighu ya vishawalata viwi va magho, ukanineka.

Wowa ghwa wandu

²³ “Muendasikira lwaka aghadi ya kira, na kuwona mghondi ghukiaka modo, wabaa wa vichuku venyu vose, na waghosi wenyu wikanisoghodera

²⁴ wikighamba, ‘Ola BWANA Mlungu odu wadiwonyera wubaa ghwake na ndighi rake, nesi dasikira lwaka lwake aghadi ya modo; dawona idime kukaia yadimika Mlungu ughore na mdamu sena ukaie moyo.

²⁵ Idana kwaki dikungiragha kifonyi? Ughu modo ghuko m'baa ghudimeria; dikachuria kulusikira lwaka lwa BWANA Mlungu odu, dichafwa.

²⁶ Ni mdamu uao usikire Mlungu uko moyo ukighora aghadi ya modo seji dasikira nao ukakaia moyo?

²⁷ Oho Musa, ghenda kaavui kusikire malagho ghose BWANA Mlungu odu uchaaghighora, ima kuchedighoria agho malagho ghose BWANA Mlungu odu waghora; nesi dichasikira na kughibonya.’

²⁸ “Iji morekoghe mkidedanya nani, BWANA oresikireghe malagho ghenyu; nao ukanizera, ‘Nasikira malagho gha awa wandu seji wakuzera, malagho ghawo ghose waghora ghaboie.

²⁹ Hee, na ngera wadakaia na iyo nia cheni eniobua na kuiwadia memu yapo kari kose, yadakaia nicha kwawo na kwa wana wawo kwa kala na kala.

³⁰ Ghenda kuwizere wiwuye hemenyi kwawo.

³¹ Ela oho kaia aeniaha kaavui nani, nani nichakuneka memu yose na sharia na malaghiro agho kuchaawifundisha, eri wipate kughibonya andenyi ya ijo isanga nichaawineka wijiwuse.’

³² “Kwa huwo mlindie kubonya sa iji koni BWANA Mlungu onyu umlaghirie, mseghaluke.

³³ Mghende seji BWANA Mlungu onyu ulaghirie, mpate kukaia moyo na kuwona nicha; matuku ghenyu ghikaie mengi andenyi ya isanga mchaajiwusa.