WUKUMBUSO 34 - Biblia Ilagho Jiboie Kwa Wandu Wose

Kifwa cha Musa

¹ Niko Musa ukajoka Mghondi ghwa Nebo kufuma wurindi ghwa Moabu, hata mdonyi ghwa Mghondi ghwa Pisga, ghulangayagha mashariki ya Jeriko. BWANA ukammbonyera isanga jose; Gileadi hata Dani,

² isanga jose ja Naftali, isanga ja Efraimu na Manase, isanga jose ja Juda hata kuvikia Bahari ya Mediterania;

³ Negebu na Wurindinyi, nagho ni vololo ya Jeriko muzi ghwa mitende hata kuvikia Soari.

⁴ BWANA ukamzera Musa, “Iji nijo isanga neremlaghirieghe Abrahamu, na Isaaka, na Jakobo ngimzera kukaia nichachineka kivalwa chako. Naakusigha kujiwone na meso ghako, ela ndekuchaaruwuka aho.”

⁵ Kwa huwo Musa mdumiki wa BWANA ukafwa isanga ja Moabu kunughana na ilagho ja BWANA;

⁶ na BWANA ukamrika vololonyi isanga ja Moabu kulangaya Beth-peori; ela ndekuwadie mndungi umanyagha kaburi yake hata idime.

⁷ Musa orekoghe wa irika ja miaka ighana na mirongo iwi ngelo ya kufwa kwake; oofwa uko na ndighi rake woruwu, meso ghake ghiko na ndighi.

⁸ Wandu wa Israeli wikamlilia matuku mirongo idadu wurindinyi ghwa Moabu; niko matuku ghemlilia Musa ghikatua.

⁹ Joshua mwana wa Nuni ukachulwa ni hikima, angu Musa orekoghe wammbika uwade wulalo ghwake; kwa wundu ugho wandu wa Israeli wikamsikira, nao ukabonya seji BWANA oremlaghirieghe Musa.

¹⁰ Na jingi mlodi ungi ndecheewuka andenyi ya Israeli uko sa Musa; BWANA wadaaja malagho nao wushu kwa wushu.

¹¹ Ndeuko mlodi ungi ubonyere weke mwakilimbiti na mashiniko sa Musa, seji BWANA oremdumieghe kughibonya kwa mzuri wa Misri, na kwa wabaa wake wose wa isanga jake jose;

¹² hata ndekuwadie mlodi ungi ubonyere kazi mbaa reobosha seji Musa orebonyereghe Waisraeli wose wikiwona.